فیلمێكی كوردی كێبڕكێی بردنه‌وه‌ی خه‌ڵاتی فێستیڤاڵی به‌یروت ده‌كات

فیلمێكی كوردی كێبڕكێی بردنه‌وه‌ی خه‌ڵاتی فێستیڤاڵی به‌یروت ده‌كات

فیلمی (ونبوون له‌ غوبار)ی ده‌رهێنه‌ر سۆران ئیبراهیم به‌ نوێنه‌رایه‌تی هه‌رێمی كوردستان و وه‌ك تاكه‌ فیلمێكی كوردی له‌ به‌شی پێشبڕكێی سه‌ره‌كی خولی 15هه‌مینی فێستیڤاڵی نێونه‌ته‌وه‌یی فیلمی به‌یروت، به‌شداری ده‌كات.

(سۆران ئیبراهیم) ده‌رهێنه‌ری فیلمه‌كه‌، له‌باره‌ی به‌شداریكردنی فیلمه‌كه‌ له‌و فێستیڤاڵه‌دا ڕایگه‌یاند:"له‌ خولی پانزه‌هه‌مینی فێستیڤاڵی نێونه‌ته‌وه‌یی فیلمی به‌یروت كه‌ له‌ وڵاتی لوبنان ئه‌نجام ده‌دری، فیلمی (ونبوون له‌ غوبار) له‌ به‌شی پێشبڕكێی سه‌ره‌كیدا به‌شداری ده‌كات و كێبڕكێی بردنه‌وه‌ی خه‌ڵات ده‌كات".  وتیشی:"فێستیڤاڵه‌كه‌ له‌ ڕۆژی 8ی ئۆكتۆبه‌ری  2015له‌ شاری به‌یروت ده‌ستپێده‌كات و هه‌تا 16ی هه‌مان مانگ به‌رده‌وام ده‌بی".

له‌باره‌ی چیرۆكی فیلمه‌كه‌شه‌وه‌، (سۆران ئیبراهیم)ی ده‌رهێنه‌ر وتی:" چیرۆكی فیلمه‌كه‌ سه‌باره‌ت به‌ جینۆساید و ئه‌نفالی كورده‌ و له‌ رێگه‌ی چیرۆكێكی ئه‌ویندارییه‌وه‌ تراژیدیای ئه‌نفال و جینۆسایدی كورد ده‌گێڕێته‌وه‌".

فیلمی (ونبوون له‌ غوبار) له‌لایه‌ن تاهیر عه‌بدوڵا پشتگیری كراوه‌ و به‌رهه‌م هاتووه‌. ستافی به‌رهه‌مهێنانی ئه‌م فیلمه‌ بریتین له‌:"سیناریۆ: هێمن حه‌یده‌ری، یاریده‌ده‌ری ده‌رهێنان: نه‌زیر میرزای، وێنه‌گرتن: حه‌مید قه‌وامی، یاریده‌ده‌ری وێنه‌گرتن: عه‌لی مورادی، دیزاینی لوكێشن: سۆران ئیبراهیم، به‌ڕێوه‌به‌ری به‌رهه‌م: ئه‌كبه‌ر گوڵی، ده‌نگهه‌ڵگر:محه‌مه‌د تۆریوه‌ریان، فۆتۆگراف: قادر فه‌ره‌جی، به‌ڕێوه‌به‌ری ڕاگه‌یاندن: شۆڕش محه‌مه‌د، نواندن: سۆران ئیبراهیم، دیمه‌ن زه‌ندی، په‌یام عه‌له‌وی، مۆنتاژ: سۆران ئیبراهیم، تۆفیق ئه‌مانی.

پێشتریش ئه‌م فیلمه‌ له‌ فێستیڤاڵی سینه‌مایی نێونه‌ته‌وه‌یی هه‌ولێر خه‌ڵاتی باشترین فیلمی نێوده‌وڵه‌تی وه‌رگرت و هه‌روه‌ها له‌ خولی 52هه‌مینی فێستیڤاڵی ماڵتا فیلم فێستیڤاڵ خه‌ڵاتی سوارچاكی زێڕینی به‌ده‌ستهێنا و هه‌روه‌ها له‌ به‌شی پێشبڕكێی سه‌ره‌كیدا له‌ خولی 36هه‌مینی فێستیڤاڵی سینه‌مایی نێوده‌وڵه‌تی قاهیره‌ به‌شداری كردووه‌ و له‌ چه‌ندین فێستیڤاڵی سینه‌مایی جیهانی دیكه‌ش به‌شدار بووه‌.

هه‌روه‌ها ساڵی 2014 له‌لایه‌ن ده‌زگای ڕوانگه‌وه‌ خه‌ڵاتی لاوی ساڵ وه‌ك باشترین سینه‌ماكار درایه‌ ده‌رهێنه‌ر سۆران ئیبراهیم.

بۆ زانیاری زیاتر:
http://www.beirutfilmfestival.org/

به‌ڕێوه‌به‌رایه‌تی ڕاگه‌یاندنی گشتی فیلمی (ونبوون له‌ غوبار)