به‌ده‌ل ره‌ڤو شه‌ڤێن ڤییه‌نا ب هه‌لبه‌ستێن كوردی رۆهنكرن

به‌ده‌ل ره‌ڤو شه‌ڤێن ڤییه‌نا ب هه‌لبه‌ستێن كوردی رۆهنكرن

شاهبازی هه‌لبه‌ستا كوردی د ئێڤاریه‌كا تایبه‌ت دا 24/7/2015 ل دۆر ئه‌ده‌بی كوردی ل ئه‌سمانی ڤییه‌نا فڕی كو هه‌لبه‌ستڤانی ناڤبری نموونا دلپاكی و وه‌فاداریی یه‌ بۆ دۆزا گه‌لی خوه‌یی كورد كو هه‌می كاراێن خوه‌ بێی راسپاردن یان ئه‌ركه‌كی فه‌رمی ئه‌نجام دده‌ت و ل دووڤ گۆتنا هنده‌ك نڤیسه‌ر و ره‌وشه‌نبیرێن كورد و بیانی به‌ده‌ل ره‌ڤه‌ یی ژ هه‌ژی یه‌ ببیته‌ بالیۆزی ره‌وشه‌نبیریا كوردی ل هانده‌ران.

گه‌شتیاری ئه‌ده‌بی ل پایته‌ختی نه‌مسا بۆ مێهڤان و هه‌ڤال و هه‌لبه‌ستڤان ل په‌یمانگه‌ها ئورۆئاسیه‌وی یا مالا عه‌ره‌بی و نه‌مساوی یا ره‌وشه‌نبیری و هونه‌ری ب هه‌لكه‌فتا ئیمزاكرنا پرتووكا به‌ده‌ل ره‌ڤوی یا ب ناڤی "باز و هه‌لبه‌ستێن وه‌لای به‌فری و ئاگری" یا ژ مالا كاروبارێن ره‌وشه‌نبیری ل به‌غدا ده‌ركه‌فتی هاتیه‌ رێكخستن، كو به‌ری نوكه‌ و بۆ گه‌له‌ك جاران ئه‌ڤ چۆره‌ چالاكیه‌ بۆ بالیۆزی ئه‌ده‌بی كوردی ل مالا كوردان ل نه‌مسا ب هه‌لكه‌فتێن ئه‌ده‌بی و شعری ل باژێرێن سالزبورگ و ڤییه‌نا هاتینه‌ رێكخستن.

رۆماننڤیسا عیراقی د. ئه‌میرا فه‌یسه‌ل، هه‌لبه‌ستڤان به‌ده‌ل ره‌ڤو بۆ به‌رهه‌ڤبوویان دا نیاسین و به‌حسی ژیان و خواندن و به‌رهه‌مێن ویێن ئه‌ده‌بی و شعری كر و پویڤه‌كا راستگۆ د ده‌ر حه‌قی ڤی كه‌سی دا گۆت: مالا عه‌ره‌بی شانازیی ب خوه‌ دبه‌ت كو هه‌لبه‌ستڤانه‌كی كورد و ئه‌دیبه‌كی گه‌شتیار مێهڤان بكه‌ت، به‌ری هه‌لبه‌ستڤان به‌ده‌ل ره‌ڤو بهێت و ده‌ست ب خواندنا هه‌لبه‌ستان بكه‌ت، هونه‌رمه‌ندی كورد عه‌بدولره‌حمان ب سازا خوه‌ هنده‌ك ئاوازێن چیا ژه‌نین. هه‌لبه‌ستڤانی ناڤبری بخێرهاتنا جه‌ماوه‌ری كر كو ژ وه‌لاتێن مسر و سوودان و لیبیا و عیراق و كوردستانی و ئوردون و سووریا هاتبوون، ل ده‌ستپێكی ناڤبری به‌حسی ئه‌ده‌بی هانده‌ران كر و دیار كر كو هه‌لیه‌ستێن خوه‌ ل وان وه‌لاتان نڤیسینه‌ یێن وی سه‌ره‌دانا وان كری و هه‌ر هه‌لبه‌سته‌كا وی چیرۆكا گه‌شته‌كی و ده‌مه‌كی و جهه‌كی و خه‌مه‌كی یا ل دووڤ هه‌ی و هه‌لبه‌ست هه‌ڤركیه‌كه‌ د ناڤبه‌را وی و ناخی وی دا.
هه‌لبه‌ستێن هه‌لبه‌ستڤانی ده‌نگی راستیی و مرۆڤاتیی بوون و گۆت پێدڤیه‌ ئه‌دیب ببیته‌ ده‌نگی گه‌لی خوه‌ و ب خه‌م ڤه‌ گۆت كو هه‌لبه‌ستڤانێن وه‌لاتی و هه‌لبه‌ستێن وان ساخله‌تێن ئه‌ده‌بی هانده‌ران پێڤه‌ دیار دبن و دی بینین ئه‌و د وه‌لاتێن خوه‌دا د هاڤی نه‌ و ل ڤێری مه‌ره‌ما وی ئه‌ده‌بی راسته‌قینه‌ بوو و نه‌ به‌حسی دهۆل قوت و زڕنا بێژان بوو.

ئه‌و هه‌لبه‌ستێن ره‌ڤوی خواندین ل وه‌لاتێن مه‌غربو هندستانی و مه‌كسیك و كازاخستانی و نه‌مسا و مسر و هنده‌ك وه‌لاتێن دی هاتبوونه‌ ڤه‌هاندن، جه‌ماوه‌ر ژی ب شێوه‌كی نه‌ پێشبینیكری ل گه‌ل هه‌له‌ستێن وی دژیا و باندۆره‌كا مه‌زن لی هاته‌ كرن.

پشتی ڤی چه‌ندی گه‌نگه‌شه‌ك هاته‌ كرن و مێهڤانی به‌رسڤا پرسیارێن جه‌ماوه‌ری دان و پاشی ئیمزا ل سه‌ر پرتووكا "باز" هاته‌ كرن كو 66 هه‌لبه‌ستڤانێن كوردستانی ژ كچ و كوڕان بخوه‌ڤه‌ دگریت. هه‌لبه‌ستێن ره‌ڤوی ب زمانێن كوردی و عه‌ره‌بی هاتنه‌ خواندن و په‌یڤێن جوان و نازك و تێر رامان تیچدا بوون كو مرۆڤی پی هه‌ست ب خه‌ریبیا وه‌لاتی دكه‌ت.

سوپاس بۆ ته‌ هه‌لبه‌ستڤان به‌ده‌ل ره‌ڤو و ئه‌م چاڤه‌ری ینه‌ كا دی گه‌شتا ته‌ یا بهێت دی ل كیش جهی دونیایی بیت، به‌ده‌ل ره‌ڤو نڤیسه‌ر و میدیاكار و ئه‌دیب و وه‌رگێری ئه‌ده‌بی گه‌شتانه‌ كو تلمۆرێن وی ددیارن و ل جیهانی دگه‌ریت دا ره‌وشه‌نبیریا كوردی به‌لاڤ بكه‌ت و ل سه‌ر كیستی به‌ریكا خوه‌، له‌ورا ره‌ڤی جهه‌كی تایبه‌ت ل نك وه‌لاتیێن خوه‌یێن كوردستانی هه‌یه‌ و بتایبه‌ت كه‌سێن ساده‌ و ساكار و هه‌ڤبه‌ندیێن ب هێز ل وه‌لاتێن عه‌ره‌بی یێن هه‌ین له‌ورا شیا ره‌وشه‌نبیریا كوردی ل گه‌ل كانیێن ئه‌ده‌بی مرۆڤاتیی تێكهه‌ل بكه‌ت. نموونێن وه‌كو ره‌ڤوی ژ هونه‌رمه‌ند و ئه‌دیب ناسناما راسته‌قینه‌یا وه‌لاتی خوه‌نه‌، دگه‌ریێت و گه‌شتان دكه‌ت و كوترا هه‌لبه‌ستا كوردی ل گه‌ل وی د ئاسوویێن ئه‌ده‌بی مرۆڤاتیی دا دفڕیت. چاڤی مه‌ یی ل به‌رهه‌م و چالاكیێن ته‌ هه‌لبه‌ستڤانی هێژا و كوردپه‌روه‌ر.

PUKmedia به‌یاری زاویته‌یی