به‌رهه‌مهێنانی گه‌نم پێویستی دانیشتوانی هه‌رێم پڕده‌كاته‌وه‌

له‌ساڵی 2013 دا بڕی 500 هه‌زار تۆن گه‌نم به‌رهه‌مهێنراوه‌

پێشبنی ده‌كرێت له‌ئه‌مساڵدا زه‌وییه‌ كشتوكاڵییه‌كانی هه‌رێمی كوردستان، بڕی 800 هه‌زار تۆن گه‌نم به‌رهه‌مبهێنن و به‌مه‌ش پێداویستی دانیشتوانی هه‌رێم پڕده‌بێته‌وه‌.

 له‌و باره‌یه‌وه‌ رزگار حه‌مه‌د، جێگری به‌ڕێوه‌به‌ری به‌ڕێوه‌به‌رایه‌تی كشتوكاڵی سلێمانی به‌ PUKmedia ی راگه‌یاند: ساڵ دوای ساڵ به‌رهه‌مهێنانی گه‌نم له‌هه‌رێمی كوردستان رووی له‌ زیادبوونه‌، به‌شێوه‌یه‌ك له‌ساڵی 2013 دا بڕی 500 هه‌زار تۆن گه‌نم به‌رهه‌مهێنراوه‌و  له‌ساڵی 2014 دا بڕی 700 هه‌زار تۆن گه‌نم هاتوه‌ته‌ به‌رهه‌م و له‌ئه‌مساڵیشدا پێشبینی ده‌كرێت بڕی 800 هه‌زار تۆن گه‌نم به‌رهه‌مبهێنرێت.

وتیشی: به‌ به‌رهه‌مهێنانی ئه‌و بڕه‌ی گه‌نم، پێداویستی دانیشتوانی هه‌رێمی كوردستان پڕده‌بێته‌وه‌، كه‌ له‌به‌شه‌ خۆراكی مانگانه‌ بۆ هه‌ر هاووڵاتییه‌ك بڕی 9 كیلۆگرام ئارد دیاریكراوه‌.

PUKmedia سه‌فین ئه‌حمه‌د