گه‌وره‌ترین سایلۆ له‌ ناحیه‌ی پیره‌مه‌گرون ده‌كرێته‌وه‌

توانای وه‌گرتنی 80 هه‌زار ته‌ن دانه‌وێڵه‌ی هه‌یه‌

به‌ئاماده‌بوونی وه‌زیری پیشه‌سازی و بازرگانی حكومه‌تی هه‌رێمی كوردستان و پارێزگاری سلێمانی و ئه‌ندامانی ئه‌نجومه‌نی پارێزگای سلێمانی و ئه‌ندامانی په‌رله‌مانی كوردستان و ئه‌ندامانی ئه‌نجومه‌نی ناوه‌ندو قائمقامی قه‌زای دوكان و ئیداره‌ی ناحیه‌ی پیره‌مه‌گرون و كونسوڵی وڵاتان، سایلۆی وه‌رگرتنی دانه‌وێڵه‌ له‌ ناحیه‌ی پیره‌مه‌گرون كرایه‌وه‌.

 د. ئاسۆ فه‌ره‌یدون پارێزگاری سلێمانی له‌ وته‌یه‌كدا راگه‌یاند: ده‌ستخۆشی بۆ ستافی ئه‌ندازیارانی خۆماڵی كه‌ ئه‌م پرۆژه‌یان به‌ كۆتا گه‌یاندو توانیان بۆ یه‌كه‌مجار گه‌وره‌ترین سایلۆ له‌ سنوری پارێزگای سلێمانی دورستبكه‌ن.
 وتیشی: ئه‌و پرۆژه‌یه‌ ده‌بێته‌ هۆی چاره‌سه‌ركردنی كێشه‌ی وه‌رگرتنی دانه‌وێڵه‌ی جوتیاران له‌ سنوری پارێزگای سلێمانی، كه‌رتی ئابوری و كشتوكاڵ زیاتر به‌ره‌و پێش ده‌بات.

 سایلۆی پیره‌مه‌گرون له‌ سه‌ر رووبه‌ری 44 دۆنم زه‌وی و به‌بڕی زیاتر له‌ ١٩ ملوێن دۆلار له‌ سه‌ر بوجه‌ی وه‌زاره‌تی بازرگانی دورستكراوه‌، له‌ یه‌ك سه‌عاتدا توانای وه‌رگرتنی 400 ته‌ن دانه‌وێڵه‌ی هه‌یه‌، هه‌موو به‌شه‌كانی به‌ سیسته‌می ئه‌لیكترۆنی و كۆمپیوته‌ره‌وه‌ به‌ستراونه‌وه‌و توانای وه‌گرتنی 80 هه‌زار ته‌ن دانه‌وێڵه‌ی هه‌یه‌و له‌ 20 سایلۆ پێكهاتووه‌، هه‌روه‌ها چوار كۆگای عه‌مباركردنی هه‌یه‌ كه‌ توانای 36 هه‌زار مه‌تر سێجا خواردنی له‌ كیسكراوی هه‌یه‌، جگه‌ له‌وه‌ی كافتریاو ئیداره‌و پاركی ئۆتۆمبیل و چه‌ندین به‌شی تر له‌ خۆیی ده‌گرێت، هه‌روه‌ها له‌ی خۆیه‌وه‌ وه‌زیری بازرگانی و پیشه‌سازی رایگه‌یاند كه‌ بۆ پڕكردنه‌وه‌ میلاكات به‌ شێوه‌ی سیڤی ئه‌و له‌ویه‌ت بۆ دانیشتوانی پیره‌مه‌گرونه‌.

PUKmedia شاڵاو ئه‌حمه‌د- پیره‌مه‌رگرون
فۆتۆ/ ئه‌ژین قادر