هاوپه‌یمانان 17 هێرشی ئاسمانی نوێیان بۆسه‌ر داعش راگه‌یاند

چه‌ندین تیرۆرست كوژراون

هێزه‌كانی هاوپه‌یمانان 17 هێرشی ئاسمانی نوێیان بۆسه‌ر مۆڵگه‌و باره‌گاكانی رێكخراوی تیرۆرستی داعش له‌ عیراق و سوریا راگه‌یاند.

له‌ به‌یاننامه‌یه‌كدا هێزه‌كانی هاوپه‌یمانی نێوده‌وڵه‌تی دژی داعش به‌سه‌رۆكایه‌تی ئه‌مریكا ئه‌مڕۆ 3-5-2015، رایانگه‌یاند: له‌ ماوه‌ی 24 سه‌عاتی رابردودا، فڕۆكه‌ جه‌نگییه‌كانی هاوپه‌یمانان 16 هێرشی ئاسمانییان بۆسه‌ر مۆڵگه‌و باره‌گاكانی تیرۆرستانی داعش له‌ عیراق ئه‌نجامداوه‌، زۆربه‌ی هێرشه‌كانیش له‌ناوچه‌كانی نزیك موسڵ و بێجی و ته‌له‌عفه‌ر و فه‌لوجه‌ ئه‌نجامدراون.

 له‌و به‌یاننامه‌یه‌دا ئاماژه‌ به‌وه‌شدراوه‌، فڕۆكه‌ جه‌نگییه‌كانی هاوپه‌یمانان هێرشێكی ئاسمانیان بۆسه‌ر مۆڵگه‌و باره‌گاكانی رێكخراوی تیرۆرستی داعش له‌ سوریا ئه‌نجامداوه‌و هێرشه‌كه‌ش له‌ كۆبانێ ئه‌نجامدراوه‌.

هه‌رله‌و به‌یاننامه‌یه‌دا ئه‌وه‌ روونكراوه‌ته‌وه‌، هێرشه‌كانی هاوپه‌یمانان چه‌ندین مۆڵگه‌و باره‌گای تیرۆرستانی داعشی له‌و ناوچانه‌ كردۆته‌ ئامانج و به‌وهۆیه‌شه‌وه‌ چه‌ندین تیرۆرستی داعش كوژراون و زیانێكی زۆریش به‌و تیرۆرستانه‌ گه‌یه‌نراوه‌.

PUKmedia رۆیته‌رز