ده‌رماڵه‌ی 4 مانگی مامۆستایانی وانه‌بێژ دابه‌شده‌كرێت

نزیكه‌ی (68) ملیۆن دیناره‌

 وته‌بێژی به‌ڕێوه‌به‌رێتی په‌روه‌رده‌ی شاره‌زوور رایده‌گه‌یه‌نێت, سبه‌ینێ  ده‌رماڵه‌ی 4 مانگی مامۆستایانی وانه‌بێژ له‌سنووری په‌روه‌رده‌ی شاره‌رزوور دابه‌شده‌كرێت.

بیلال عه‌لی وته‌بێژی به‌ڕێوه‌به‌رێتی په‌روه‌رده‌ی شاره‌زوور به‌ PUKmedia ی راگه‌یاند: ده‌رماڵه‌ی چوار مانگی (9-10-11-12) ساڵی رابردووی مامۆستایانی وانه‌بێژ گه‌یشتۆته‌ به‌ڕێوه‌به‌ریه‌تییه‌كه‌مان و سبه‌ینێ ده‌ستده‌كرێت به‌دابه‌شكردنی.

وتیشی: وێڕای داوای لێبووردنمان بۆ سه‌رجه‌م مامۆستایانی وانه‌بێژ، كه‌ به‌هۆی چه‌ند هۆیه‌كه‌وه‌ وه‌رگرتنی كرێی وانه‌بێژییان بۆماوه‌یه‌ك دواكه‌وت, به‌ڵام  دوای هه‌وڵ و ماندووبوون توانرا هه‌ر چوار مانگه‌كه‌ به‌یه‌ك چه‌ك سه‌رفبكرێت بۆیان.

وته‌بێژی په‌روه‌رده‌ی شاره‌زوور راشیگه‌یاند:  له‌ساڵی رابردوو به‌هۆی كه‌می مامۆستای میلاكه‌وه‌ ناچاربووین پشت به‌ مامۆستای وانه‌بێژ ببه‌ستین بۆ وتنه‌وه‌ی وانه‌كان كه‌ ژماره‌یان نزیكه‌ی 150 مامۆستا بووه‌, به‌ڵام له‌پاش دامه‌زراندنی 142 مامۆستای گرێبه‌ست , سه‌رجه‌م به‌ش و وانه‌ و پسپۆرییه‌كان پڕكڕاونه‌ته‌وه‌ و له‌ئێستادا هیچ وانه‌بێژێك له‌سنووری به‌ڕێوبه‌رێتیمان نیه‌.

 وتیشی: بڕی ئه‌و پاره‌یه‌ی كه‌ وه‌ك كرێ بۆ مامۆستایانی وانه‌بێژ دابینكراوه‌, نزیكه‌ی (68) ملیۆن دیناره‌.

بیلال عه‌لی ئه‌وه‌شی خسته‌ڕوو: به‌ڕێوه‌به‌رێتیمان ئاگاداری به‌ڕێوه‌به‌ر و یاریده‌ده‌رانی سه‌رجه‌م ئه‌و خوێندنگایانه‌ ده‌كاته‌وه‌ كه‌ مامۆستای وانه‌بێژیان هه‌بووه‌ له‌مانگه‌كانی (9-10-11-12)ی 2014، سبه‌ی دووشه‌ممه‌ به‌رواری (4-5-2015) سه‌ردانی دیوانی به‌ڕێوه‌به‌رێتیمان بكه‌ن به‌مه‌به‌ستی وه‌رگرتنی پاره‌ی وانه‌بێژان.

  به‌ڕێوه‌به‌رێتی په‌روه‌رده‌ی شاره‌زوور بۆ ئه‌مساڵی خوێندن نزیكه‌ی (1,024)مامۆستای بنه‌ڕه‌تی و (522) مامۆستای ئاماده‌یی له‌پڕۆسه‌ی خوێندنی (2014-2015) به‌شداربوون كه‌ئیش و كاره‌كانی سنووری په‌روه‌رده‌كه‌ له‌لایه‌ن (16) به‌ش و یه‌كه‌وه‌ به‌ڕێوه‌ده‌برێت.

PUKmedia  ئه‌حمه‌د مسته‌فا