تاووتوێی پێكهێنانی لیژنه‌كانی یادی ئه‌نفال ده‌كرێت

بڕیاردرا له‌سه‌ر به‌رنامه‌ی یاده‌كه‌و ئه‌و لیژنانه‌ بۆ یاده‌كه‌ پێكهاتوون

ئه‌مڕۆ 29/3/2015 به‌ ئاماده‌بوونی هه‌ریه‌ك له‌ مه‌حمود حاجی ساڵح وه‌زیری كاروباری شه‌هیدان و ئه‌نفالكراوان، سه‌ڵاح كوێخا سه‌رپه‌رشتیاری ئیداره‌ی گه‌رمیان و یه‌كه‌ ئیدارییه‌كانی سنوره‌كه‌، نوێنه‌ری رێكخراوه‌كانی تایبه‌تمه‌ند له‌بواری ئه‌نفال و به‌ڕێوه‌به‌رانی گشتی وه‌زاره‌تی شه‌هیدان و ئه‌نفالكراوان، نوێنه‌ری رێكخراوه‌كانی تایبه‌تمه‌ند له‌بواری ئه‌نفالكراوان، كۆبوونه‌وه‌یه‌كی فراوان له‌ ئیداره‌ی گه‌رمیان به‌ڕێوه‌چوو.

له‌ سه‌ره‌تای كۆبوونه‌وه‌كه‌دا سه‌رپه‌رشتیاری ئیداره‌ی گه‌رمیان به‌خێرهاتنی وه‌زیری كاروباری شه‌هیدان و ئه‌نفالكراوان و وه‌فدی هاوڕێی كردو ئاماژه‌ی به‌و كۆبوونه‌وه‌یه‌ كرد كه‌ تیایدا قسه‌ له‌سه‌ر رێوشوێنی یادی ئه‌نفال له‌ 14-4 كردو ئه‌و لیژنانه‌ش كه‌ بۆ ئه‌م بابه‌ته‌ پێكهاتووه‌، هه‌روه‌ها روونیشیكرده‌وه‌ كه‌ ده‌سته‌به‌ری تێچووی یاده‌كه‌یان كردووه‌و به‌پێی لیژنه‌ی خه‌رجی مامه‌ڵه‌ی له‌گه‌ڵدا ده‌كه‌ن.

لای خۆشیه‌وه‌ وه‌زیری كاروباری شه‌هیدان و ئه‌نفالكراوان دوای ئه‌وه‌ی ئاماژه‌ی به‌و بارودۆخه‌ كرد كه‌ كوردستان پێیدا تێپه‌ر ده‌بێت و تیشكی خسته‌سه‌ر شێوازی یاده‌كان و ئه‌و پرۆژه‌ی كه‌ ئاڕاسته‌ی ئه‌نجومه‌نی وه‌زیران كراوه‌ سه‌باره‌ت به‌ یاده‌كان، ته‌ئكیدی له‌وه‌شكرده‌وه‌ كه‌ ده‌بێت یادی ئه‌نفال له‌ئاست مه‌زنی یاده‌كه‌دا بێت و گرنگی پێبدرێت، به‌گرنگیشه‌وه‌ باسی له‌ رۆڵی رێكخراوه‌كان كرد بۆ گه‌یاندنی داواكاری كه‌سوكاری شه‌هیدان و هاوكارییان بۆ زیاتر خزمه‌تكردنی كه‌سوكاری شه‌هیدان و ئه‌نفالكراوان.

دوای ته‌واوبوونی كۆبوونه‌وه‌كه‌و به‌ مه‌به‌ستی گوێگرتن له‌ داواكاری كه‌سوكاری شه‌هیدانی ئه‌نفال وه‌ك نوێنه‌ری به‌رگریكار له‌ مافی ئه‌نفالكراوان، وه‌زیری كاروباری شه‌هیدان و ئه‌نفالكراوان له‌گه‌ڵ نوێنه‌ری رێكخراوه‌كانی تایبه‌تمه‌ند له‌بواری ئه‌نفال كۆبووه‌وه‌و گوێی له‌ داخوازییه‌كانیان گرت و ته‌ئكیدی له‌ گرنگی رێكخراوه‌كان بۆ گه‌یاندنی داواكاری كه‌سوكاری شه‌هیدان و ئه‌نفالكراوان كرده‌وه‌، داواشی لێكردن كه‌ له‌ رێگای فیدراسیۆنێك كار له‌سه‌ر زیاتر خزمه‌تكردنی كه‌سوكاری شه‌هیدان و ئه‌نفالكراوان بكات.

له‌و كۆبونه‌وه‌یه‌دا بڕیاردرا له‌سه‌ر به‌رنامه‌ی یاده‌كه‌و ئه‌و لیژنانه‌ بۆ یاده‌كه‌ پێكهاتوون.

PUKmedia  فوئاد عوسمان