خورماڵ.. گه‌نجێك فڕۆكه‌یه‌كی بێفڕۆكه‌وان دروستده‌كات

ده‌توانێت له‌رێگه‌ی كۆنترۆڵه‌وه‌ وێنه‌ی هه‌رشوێنێكت بوێت پێی بگریت و دواتر لێبده‌یته‌وه‌

گه‌نجێكی ناحیه‌ی خورماڵ فڕۆكه‌یه‌كی بێ فڕۆكه‌وان دروستده‌كات و له‌ڕێگه‌شیه‌وه‌ ده‌توانریت وێنه‌ی شوێنه‌كانی پێبگیرێت و داواشده‌كات ده‌ستگیرۆیی بكرێت بۆ ئه‌وه‌ی به‌رهه‌مێكی تۆكمه‌ بۆ پێشمه‌رگه‌كان دروستبكات و له‌ڕێگه‌یه‌وه‌ بتوانن وێنه‌ی دوژمن و شوێنه‌كانیان بگرن.

به‌دووری چه‌ند كیلۆمه‌ترێك له‌ ناحیه‌ی خورماڵ و له‌ گوندی یاڵانپی، فه‌یرۆز سه‌عید قادر كه‌ گه‌نجێكی ناحیه‌ی خورماڵه‌ فڕۆكه‌یه‌ك دروستده‌كات كه‌ ده‌توانێت له‌ رێگه‌ی كۆنترۆڵه‌وه‌ وێنه‌ی هه‌ر شوێنێكت بوێت پێی بگریت و دواتر وێنه‌كان لێبده‌یته‌وه‌.

فه‌یرۆز سه‌عید به‌ PUKmedia ی راگه‌یاند: ماوه‌ی (6) ساڵه‌ ئه‌و بیرۆكه‌یه‌م هه‌یه‌، به‌ڵام ماوه‌ی (2) ساڵه‌ هه‌ندێك كه‌ره‌سته‌م ده‌ستكه‌وت و توانیم ئه‌و فڕۆكه‌ دروستبكه‌م، كه‌ كێشه‌كه‌ی زیاد له‌ یه‌ك كیلۆیه‌و ده‌توانێت بۆ ماوه‌ی (1) كلیۆمه‌تر دووربكه‌وێته‌وه‌و (700) مه‌تر به‌رزببێته‌وه‌و هه‌روه‌ها خێراییه‌كی زۆری هه‌یه‌ له‌ فڕیندا.

وتیشی: گه‌ر كه‌رتی تایبه‌ت یان گشتی هاوكاریم بكات، ئه‌وا ده‌توانم تۆكمه‌تر دروستی بكه‌م و بیخه‌مه‌ خزمه‌ت پێشمه‌رگه‌ قاره‌مانه‌كانه‌وه‌ بۆ ئه‌وه‌ی سودی لێببینن.

فه‌یرۆز به‌هره‌مه‌ندییه‌كه‌ی ده‌گه‌ڕێته‌وه‌ بۆ سه‌رده‌می منداڵی، كاتێك پاسكیله‌كه‌ی ده‌كاته‌ ماتۆڕسكێل و هه‌روه‌ها به‌له‌مێكیش دروستده‌كات، ئێستاش فڕۆكه‌.

فه‌یرۆز له‌دایك بووی ساڵی 1990ی گوندی یاڵانپیه‌و له‌ ئێستادا خوێندكاری به‌شی ژمێریارییه‌ له‌ قه‌زای ده‌ربه‌ندیخان.

PUKmedia  فه‌رحان حه‌مه‌خان - خورماڵ