بروسكه‌ی پیرۆزبایی كۆسره‌ت ڕه‌سول بۆ ڕزگاركردنی كۆبانێ

كۆسره‌ت ڕه‌سول عه‌لی

به‌بۆنه‌ی ئازادكردنی كۆبانێ و تۆماركردنی ئه‌و سه‌روه‌رییه‌ گه‌وره‌یه‌ی گه‌لی كورد، كۆسره‌ت ڕه‌سول عه‌لی جێگری سه‌رۆكی هه‌رێم بروسكه‌یه‌كی پیرۆزبایی ئاڕاسته‌ی هێزه‌كانی پێشمه‌رگه‌و یه‌په‌گه‌ و یه‌په‌ژه‌ شۆڕشگێڕان و ئازادیخوازان له‌ سه‌رتاسه‌ری جیهان كرد.
ئه‌مه‌ش ده‌قی بروسكه‌كه‌یه‌:
 
بروسكه‌ی پیرۆزبایی كۆسره‌ت ڕه‌سول بۆ ڕزگاركردنی كۆبانێ

جه‌ماوه‌ری گه‌لی كوردستان

شێره‌ كوڕانی پێشمه‌رگه‌و یه‌په‌گه‌ و یه‌په‌ژه‌

شۆڕشگێڕان و ئازادیخوازان له‌ سه‌رتاسه‌ری جیهان

  ئه‌م سه‌ركه‌وتنه‌ مێژویی و ده‌گمه‌نه‌تان پیرۆز، ئه‌و به‌رخودان و به‌رگری و گیانفیداییه‌تان ، ئه‌و هه‌ڵمه‌ت و هێڕش و په‌لاماره‌ پڵنگ ئاساییه‌تان پیرۆز بۆ ڕزگاركردنی شاری به‌رگری (كۆبانێ)  .

  ئێوه‌ سه‌لماندتان كه‌ گه‌لی كورد به‌ درێژایی ئه‌و هه‌زاران ساڵه‌ به‌رامبه‌ر ئه‌و سه‌دان داگیركه‌رو كۆنه‌په‌رستانه‌ به‌ چی شێوه‌یه‌ك پارێزگاری له‌ خاك و مانه‌وه‌و ژیان كردوه‌ ، سه‌لماندتان كه‌ ئێوه‌ نوێنه‌ری گه‌لێكن هبچ كاتێك چۆكی دانه‌داوه‌ بۆ دوژمنانی .

سه‌لماندتان ڕۆڵه‌ی گه‌لێكن ده‌توانێ ڕێز له‌ ئازادی بگرێ و خاكی خۆی خۆش بوێ .

ئێوه‌ ته‌نها نوێنه‌ری خۆتان نه‌بون ، به‌ڵكو له‌ جیاتی هه‌موو كۆمه‌ڵگه‌ی نێوده‌وڵه‌تی و ژیاندۆستانی دونیا ده‌جه‌نگن .

ئێوه‌ كۆبانیتان كرد به‌ ئه‌فسانه‌یه‌كی نوێی مقاوه‌مه‌ت له‌ سه‌رده‌می به‌سه‌رچونی پاڵه‌وانه‌ ئه‌فسانه‌ییه‌كاندا .

ئێوه‌ چۆكتان به‌ له‌شكری تاریكی و مێشكی به‌تاڵ و كۆنه‌په‌رستان دادا ، كه‌ سه‌رو ماڵو ناموسی كوردانیان حه‌ڵاڵ كردووه‌ .

ئێوه‌ پێتان گوتن : ئێره‌ كوردستانی ئازاده‌و مافی ژیان و ژنانی تێدا پارێزراوه‌ .

جه‌ماوه‌ری خۆڕاگری كوردستانی گه‌وره‌...نابێ له‌ پیرۆزبایكردنی ئه‌م سه‌ركه‌وتنه‌ مه‌زنه‌دا ڕۆڵی ئازادیخوازانی جیهان و كۆمه‌ڵگه‌ی نێوده‌وڵه‌تی و سه‌رۆكایه‌تی هه‌رێم و حكومه‌تی كوردستان نادیده‌ بگرین ، كه‌ به‌ بڕیارێكی بوێرانه‌ی كوردانه‌ سنوره‌ ده‌سكرده‌كانی كوردستانیان به‌زاندو پێشمه‌رگه‌یان گه‌یانده‌ كۆبانێ ،ئه‌و هه‌نگاوه‌ ڕوحی نه‌ته‌وه‌یی و خۆشه‌ویستی نیشتمانی بوژانده‌وه‌ ، كه‌ خاكی كوردان له‌ هه‌ركوێیه‌ك بێت كوڕان و كچانی گیانفیدای كوردان له‌وێن .

  دوباره‌ ئه‌و سه‌ركه‌وتنه‌ مه‌زنه‌تان پیرۆز و هه‌ڵمه‌تتان شێرانه‌تر و ئامانجتان ڕونتر بێت بۆ سه‌ربه‌خۆیی و ئازادی ته‌واوی كوردستان .

بژی كورد ، بژی كوردستان
بژی پێشمه‌رگه‌و سه‌رجه‌م جه‌نگاوه‌رانی ئازادی
درود بۆ گیانی پاكی شه‌هیده‌كانمان

كۆسره‌ت ڕه‌سول عه‌لی
جێگری سه‌رۆكی هه‌رێم

PUKmedia