قوباد تاڵه‌بانی: په‌رله‌مان یاسای وه‌به‌رهێنان هه‌موار بكاته‌وه‌

متمانه‌ بۆ كه‌رتی وه‌به‌رهێنان بگه‌ڕنرێته‌وه‌

جێگری سه‌رۆكی حكومه‌تی هه‌رێم له‌ چۆنێتی به‌ڕێوه‌چوونی كاره‌كانی ده‌سته‌ی وه‌به‌ر‌هێنان ده‌كۆڵێته‌وه‌ و پیرۆزبایی له‌ سه‌رۆكی نوێی ده‌سته‌ی وه‌به‌ر‌هێنان ده‌كات.

به‌مه‌به‌ستی ئاگاداربوون له‌ چۆنێتی به‌ڕێوه‌چوونی كاره‌كان و له‌ نزیكه‌وه‌ گفتوگۆكردن له‌ باره‌ی گه‌شه‌ و به‌ربه‌سته‌كان، قوباد تاڵه‌بانی جێگری سه‌رۆكی ‌‌‌حكومه‌تی هه‌رێمی كوردستان به‌ یاوه‌ری وته‌بێژی حكومه‌تی هه‌رێم و سه‌رپه‌رشتیاری ئه‌نجومه‌نی ئابوری و سكرتێری ئه‌نجومه‌نی وه‌زیران و به‌ڕێوه‌به‌ری نوسینگه‌ی جێگری سه‌رۆكی حكومه‌ت، سه‌ردانی ده‌سته‌ی وه‌به‌رهێنانی كرد و له‌ لایه‌ن رێبوار خه‌لیل سه‌رۆكی ده‌سته‌كه‌وه‌ پێشوازی لێكرا.

له‌ سه‌ره‌تای دیداره‌كه‌دا جێگری سه‌رۆكی حكومه‌ت پشتیوانی سه‌رۆكایه‌تی حكومه‌تی هه‌رێمی كوردستانی بۆ ده‌سته‌ی وه‌به‌رهێنان دووپاتكرده‌وه‌و رایگه‌یاند: پێویسته‌ په‌رله‌مانی كوردستان یاسای وه‌به‌رهێنان به‌ پێی هه‌لومه‌رجی ئێستای هه‌رێم هه‌موار بكاته‌وه‌.

وتیشی: پێویسته‌ له‌ ماوه‌یه‌كی نزیكدا كۆبوونه‌وه‌ی ئه‌نجومه‌نی باڵای وه‌به‌رهێنان ئه‌نجام بدرێت و رێگه‌چاره‌ی گونجاو بۆ گرفته‌كان ده‌ستنیشان بكرێت.

له‌ كۆتایشدا جێگری سه‌رۆكی ‌‌‌حكومه‌تی هه‌رێمی كوردستان به‌ پیێویستی زانی متمانه‌ بۆ كه‌رتی وه‌به‌رهێنان بگه‌ڕێندرێته‌وه‌ و هاووڵاتیان وه‌كو پێویست سود له‌ پرٶژه‌كانی یه‌كه‌ی نیشته‌جێبوون وه‌ربگرن.

PUKmedia