راوێژكاره‌ سه‌ربازییه‌كان كاریگه‌ریان نه‌بووه‌

بێ به‌رنامه‌ی و گه‌نده‌ڵیه‌كانی سوپا هۆكارن

له‌دوای په‌لاماری گروپی تیرۆرستی داعش بۆ سه‌ر چه‌ند پارێزگایه‌كی عیراق، له‌لایه‌ن وڵاتانی گه‌وره‌ی جیهان ژماره‌یه‌كی زۆر راوێژكاری سه‌ربازی  بۆ مه‌شقپێكردن و راهێنانی هێزه‌كانی سوپا ره‌وانه‌ی عیراقكراون، به‌ڵام به‌ بۆچونی شاره‌زایان هاوسه‌نگی هێز به‌و شێوه‌ی چاوه‌ڕوانده‌كرا نه‌گۆڕاوه‌و ناوچه‌یه‌كی كه‌م ئازادكراون. 

حه‌سه‌ن جیهاد ئه‌ندامی پێشووی ئه‌نجومه‌نی نوێنه‌رانی عیراق له‌لیژنه‌ی به‌رگری به‌ PUKmedia ی راگه‌یاند: سه‌ره‌ڕای هاتنی ئه‌و ژماره‌ زۆره‌ له‌راوێژكاری سه‌ربازی له‌وڵاتانی وه‌كو ئه‌مریكا و فه‌ره‌نسا و به‌ریتانیاو كه‌نه‌داو چه‌ند وڵاتێكی تر راسته‌ چه‌ند ناوچه‌یه‌ك كۆنتڕۆڵكراونه‌ته‌وه‌، به‌ڵام تائێستا به‌و شێوه‌ییه‌ی چاوه‌ڕوانده‌كرا هاوسه‌نگی هێز نه‌گۆڕاوه‌.

وتیشی: هۆكاری سه‌ره‌كی له‌ نه‌گۆڕانی هاوسه‌نگی هێز له‌عیراق له‌نێوان هێزه‌كانی سوپای عیراق و تیرۆرستانی داعش  بۆ لاوازی هێزه‌كانی سوپا و ئه‌و بێ به‌رنامه‌یی و گه‌نده‌ڵیانه‌ ده‌گه‌ڕێته‌وه‌ كه‌له‌ وه‌زاره‌ته‌كانی ناوخۆو به‌رگری و حكومه‌تی عیراق له‌ رابردوودا هه‌بوون.

له‌باره‌ی گۆڕانكاری له‌ فه‌رمانده‌كانی سوپا له‌وه‌زاره‌تی به‌رگری و وه‌زاره‌تی ناوخۆ حه‌سه‌ن جیهاد ئاماژه‌ی بۆئه‌وه‌كرد، به‌پێی تێپه‌ڕبوونی كات ئه‌و گۆڕانكاریانه‌ كاریگه‌ری باشیان ده‌بێت له‌سه‌ر یه‌كخستنه‌وه‌ی سوپای عیراق، به‌ڵام به‌مه‌رجێك فره‌ هێزی و ململانێی تایفی باڵ به‌سه‌ر سوپای عیراقدا نه‌كێشێت.

PUKmedia  سامان یاروه‌یس