پێنجوێن.. له‌دوای راپۆرتێكی PUKmedia وه‌ خراپی ئینته‌رنێت چاره‌سه‌رده‌كرێت

كێشه‌ی هێڵی ئینته‌رنێت چاره‌سه‌رده‌كرێت

به‌هۆی بڵاوكردنه‌وه‌ی راپۆرتێكی   PUKmedia له‌سه‌ر كێشه‌ی خراپی هێڵی ئه‌نته‌رنێت له‌پێنجوێن، هێڵی ئه‌نته‌رنێت له‌و قه‌زایه‌ چاره‌سه‌ر ده‌كرێت.

دوای ئه‌وه‌ی له‌ماوه‌ی رابردوودا، ماڵپه‌ڕی PUKmedia  به‌دواداچوونی بۆخراپی هێڵه‌كانی ئه‌نته‌رنێت له‌سنووری پێنجوێن كرد، له‌ئێستادا چاوه‌ڕێده‌كرێت وه‌زاره‌تی گواستنه‌وه‌و گه‌یاندنی حكومه‌تی هه‌رێمی كوردستان، به‌نوسراوی ره‌سمی وه‌ڵامی لیژنه‌ی په‌یوه‌ندیداری په‌رله‌مانی كوردستان بداته‌وه‌و چاره‌سه‌ری ئه‌و كێشه‌یه‌ بكه‌ن.

له‌وباره‌یه‌وه‌، عه‌بدولڕه‌حمان عه‌لی، پارله‌مانتاری كوردستان له‌روونكردنه‌وه‌یه‌كدا كه‌ وێنه‌یه‌كی ده‌ست PUKmedia  كه‌وتوه‌، ئاماژه‌ی بۆ ئه‌وه‌كردووه‌، به‌هۆی ئه‌وه‌ی كه‌ به‌كارهێنه‌رانی هێڵی ئینته‌رنێتی تیشك نێت له‌پێنجوێن، ماوه‌یه‌ك بوو له‌لایه‌ن هاووڵاتیانه‌وه‌ كۆمه‌ڵێك ڕه‌خنه‌و سه‌رنجو تێبینیان له‌سه‌ر شێوازی كاركردنی هه‌بوو،  (508) ئیمزای به‌شداربووی ئه‌و هێڵه‌ كۆكرابوه‌وه‌ تاكو بگه‌یه‌نرێته‌ لیژنه‌ی تایبه‌تمه‌ندی په‌رله‌مانی كوردستان له‌و بواره‌دا.

هاوكات ئه‌وه‌شی خستۆته‌ڕوو،" ئه‌و ئیمزایانه‌ راده‌ستی لیژنه‌ی ئاسه‌وارو خزمه‌تگوزاری و شاره‌وانی و گواستنه‌وه‌و گه‌یاندن كراوه‌و رۆژی 8-12-2014 لیژنه‌ی شاره‌وانی و گواستنه‌وه‌ی گه‌یاندنی په‌رله‌مان میوانداری وه‌زیری گواسته‌وه‌و گه‌یاندن و وه‌زیری ناوخۆو سێ له‌ راوێژكاره‌كانی وه‌زاره‌تی گواستنه‌وه‌و گه‌یاندنیان كردو یه‌كێك له‌ته‌وه‌ره‌كان باسكردنی ئه‌و گرفتانه‌ی هێڵی ئینته‌رنێتی تیشك نێت بوو له‌پێنجوێن كه‌ داواكاریه‌كان هاوپێچی واژۆكان كرابوونو به‌ڵێن درا كه‌ به‌زوویی به‌دوای ئه‌و گرفته‌دا بكه‌ون".

PUKmediaپێنجوێن- رێبین حه‌سه‌ن