تا هه‌فته‌یه‌ك دابه‌شكردنی فۆڕمی گرێبه‌ستی مامۆستایان به‌رده‌وامده‌بێت

تا ئێستا بڕیاره‌ 1310 مامۆستا له‌ سنوری پارێزگای سلێمانی گرێبه‌ستیان بۆ بكرێت

سه‌رله‌به‌یانی ئه‌مڕۆ 23-11-2014، له‌ یانزه‌ به‌ڕێوه‌به‌رێتی په‌روه‌رده‌ی پارێزگای سلێمانی، ده‌ستكراوه‌ به‌ دابه‌شكردنی فۆڕمی دامه‌زراندنی مامۆستایان به‌ شێوه‌ی گرێبه‌ست.

له‌و باره‌یه‌وه‌ مامۆستا نه‌جمه‌دین عه‌لی به‌ڕێوه‌به‌ری به‌ڕێوه‌به‌رێتی گشتی په‌روه‌رده‌ی سلێمانی، به‌ PUKmedia راگه‌یاند:  له‌ 11 په‌روه‌رده‌ی سه‌ر به‌ سنوری به‌ڕێوه‌به‌رێتی گشتی په‌روه‌رده‌ی سلێمانی له‌ ده‌ره‌وه‌، جگه‌ له‌ په‌روه‌رده‌ی رۆژهه‌ڵات و رۆژئاوا، فۆڕم به‌سه‌ر مامۆستایانی ده‌رچووی كۆلێژی په‌روه‌رده‌و په‌یمانگای مامۆستایان و كۆلێژی بنه‌ڕه‌تی دابه‌شده‌كرێت.

وتیشی: هه‌موو په‌روه‌رده‌یه‌ك رێژه‌یه‌كمان بۆ دیاریكردووه‌، هه‌موو كه‌سێك له‌و په‌روه‌ردانه‌ ده‌توانێت فۆڕم پڕبكاته‌وه‌.

رونیشیكرده‌وه‌: ئه‌وه‌ی زیاتر خاڵبه‌ندیمان كردووه‌ ئه‌وه‌یه‌ كه‌ نمره‌ی كۆتایی چه‌نده‌و ده‌رچووی كۆلێژ 10 خاڵی هه‌یه‌ ئه‌گه‌ر كه‌سی شه‌هیدی پله‌یه‌كی هه‌بێت 5 خاڵه‌و دانیشتوی ئه‌و شوێنه‌ بێت 5 خاڵه‌، ئه‌مانه‌ كاری بۆ ده‌كه‌ین و دوای ئه‌وه‌ی كه‌ فۆڕمه‌كان پڕكرانه‌وه‌ خاڵبه‌دی فۆڕمه‌كان ده‌كه‌ین.
راشیگه‌یاند: بۆ ماوه‌ی هه‌فته‌یه‌ك ئه‌و فۆڕمانه‌ دابه‌شده‌كرێن.

ئاماژه‌ی بۆ ئه‌وه‌شكرد: تا ئێستا بڕیاره‌ 1310 مامۆستا له‌ سنوری پارێزگای سلێمانی گرێبه‌ستیان بۆ بكرێت به‌ڵام گرفتێكمان هه‌یه‌و سبه‌ینێ كۆبوونه‌وه‌مان هه‌یه‌ له‌ وه‌زاره‌تی په‌روه‌رده‌ له‌سه‌ر ئه‌و باسه‌.

PUKmedia  هۆزان رۆسته‌م