بۆ خوێندكارانی 12ی ئاماده‌یی

دوای به‌ته‌واوه‌تی دڵنیابوون له‌هه‌ڵبژاردنه‌كانتان، ئینجا فۆرمه‌كانتان پێشكه‌شبكه‌ن

له‌ ئاگادارینامه‌یه‌كدا كه‌ كۆپیه‌كی بۆ PUKmedia نێردراوه‌، وه‌زاره‌تی خوێندنی باڵاو توێژینه‌وه‌ی زانستی خوێندكارانی قۆناغی 12ی ئاماده‌یی ئاگادارده‌كاته‌وه‌ كه‌ ئه‌مشه‌و 9-11-2014 ده‌توانن ده‌ستبكه‌ن به‌ پێشكه‌شكردنی داواكاری وه‌رگرتن له‌ زانكۆو په‌یمانگاكانی هه‌رێمی كوردستان له‌ رێگه‌ی (زانكۆلاین)ـه‌وه‌.

ده‌قی ئاگادارییه‌كه‌:
خوێندكاران/ قوتابیانی خۆشه‌ویستی قۆناغی دوانزه‌ی ئاماده‌یی ئاگادارده‌كه‌ینه‌وه‌، كه‌ له‌ سه‌عات (8)ی ئه‌مشه‌و كه‌ ده‌كاته‌ رێكه‌وتی (9/11/2014) ده‌توانن ده‌ستبكه‌ن به‌ پێشكه‌شكردنی داواكاری وه‌رگرتن له‌ زانكۆو په‌یمانگه‌كانی هه‌رێمی كوردستان له‌ رێگه‌ی (زانكـۆلایـن)ه‌وه‌.

داواش له‌ قوتابیان/ خوێندكارانی خۆشه‌ویست ده‌كه‌ین، دوای وه‌رگرتنه‌وه‌ی وشه‌ی تێپه‌ڕو نهێنی (پاسۆرد و یوزه‌ر نه‌یم) له‌ خوێندنگه‌كانیان، به‌وردی و وریایی هه‌نگاوه‌كانی پڕكردنه‌وه‌ی فۆرمی پێشكه‌شكردنی داواكاری وه‌رگرتن له‌ زانكۆ و په‌یمانگه‌كان سه‌ردانی سایتی رێگه‌ی زانكۆ (www.regayzanko.com) بكه‌نه‌وه‌، بۆ پڕكردنه‌وه‌ی فۆرمی (زانكۆ لاین)، هه‌روه‌ك داواكاریشین له‌كاتی پڕكردنه‌وه‌ی فۆرمه‌كه‌دا سوود له‌ (رێــبه‌ری وه‌رگــرتن) وه‌ربگرن كه‌ پێشتر به‌سه‌رتاندا دابه‌شكراوه‌و به‌وردی بڕیاڕو رێنماییه‌كان و چۆنێتی پڕكردنه‌وه‌ی فۆرمه‌كه‌ی بخوێننه‌وه‌ كه‌ تێیدا خراوه‌ته‌ڕوو.

له‌هه‌مانكاتدا ده‌رچووانی قۆناغی دوانزه‌ی ئاماده‌یی كه‌ ساڵی پار ده‌رفه‌تی وه‌رگرتنیان بۆ نه‌ڕه‌خسا، ئه‌مساڵیش ده‌توانن هاوشێوه‌ی ده‌رچوانی ئه‌مساڵ فۆرمی وه‌رگرتن له‌ (زانكـۆلایـن) پڕبكه‌نه‌وه‌، به‌سود وه‌رگرتن له‌ وشه‌ی تێپه‌ڕو نهێنی (پاسۆرد و یوزه‌ر نه‌یم)ی كه‌ پار ساڵ وه‌ریانگرتووه‌.

خوێندكاران/ قوتابیانی خۆشه‌ویست ئاگادارده‌كه‌ینه‌وه‌ كه‌ (زانكۆ لاین) بۆ ماوه‌ی (10) رۆژ به‌رده‌وامده‌بێت، بۆیه‌ دوای به‌ته‌واوه‌تی دڵنیابوون له‌ هه‌ڵبژاردنه‌كانتان، ئینجا فۆرمه‌كانتان پێشكه‌شبكه‌ن.

PUKmedia  تایبه‌ت