چه‌ندین بۆمب به‌ داعشدا ده‌ته‌قێته‌وه‌

فۆتۆ/ ئه‌رشیف

له‌ ئه‌نجامی بۆمبڕێژكردنی چه‌ند ناوچه‌یه‌ك له‌ سنوری قه‌ره‌ته‌په‌و جه‌له‌ولا، بۆمبه‌كان به‌ داعش خۆیاندا ده‌ته‌قێته‌وه‌.

سه‌رچاوه‌یه‌ك له‌ هێزه‌كانی پێشمه‌رگه‌ تایبه‌ت به‌ PUKmedia ی راگه‌یاند: ئه‌مشه‌و 24-10-2014 له‌كاتی دانانی بۆمبی چێندراو له‌لایه‌ن تیرۆرستانی داعشه‌وه‌ بۆ هێزه‌كانی پێشمه‌رگه‌ی كوردستان له‌ نێوان ناوچه‌ی كه‌شكۆڵ و جومه‌یلات له‌ سنوری قه‌ره‌ته‌په‌و جه‌له‌ولا، بۆمبه‌ چێندراوه‌كان به‌ تیرۆرستانی داعش خۆیاندا ته‌قیونه‌ته‌وه‌و به‌وهۆیه‌شه‌وه‌ دوو تیرۆرستی داعش كوژراون و داعشێكی تریش سوتاوه‌، هه‌روه‌ها سێ تیرۆرستی داعشی تریش كه‌ له‌ونزیكانه‌ بوون برینداربوون، ئه‌و دوو تیرۆرسته‌ی كوژراون ناویان (لوئه‌ی مه‌جید ئه‌حمه‌د - عه‌بدولمه‌جید حه‌مید)ـه‌و ئه‌و تیرۆرسته‌شی كه‌ سوتاوه‌ كاری وردبینی كردووه‌و ناوی (مه‌حمود ساڵح حه‌مید)ـه‌.

ئه‌و سه‌رچاوه‌یه‌ وتیشی: ئه‌مه‌ش ده‌رئه‌نجامی ئه‌وه‌یه‌ كه‌ له‌ ئێستادا تیرۆرستانی داعش توانای روبه‌ڕوبوونه‌وه‌ی پێشمه‌رگه‌یان نه‌ماوه‌، بۆیه‌ به‌ناچاری ده‌یانه‌وێت ئه‌و ناوچانه‌ بۆمبڕێژبكه‌ن و له‌وڕێگه‌یه‌وه‌ زه‌ره‌ر به‌ هێزه‌كانی پێشمه‌رگه‌ی كوردستان بگه‌یه‌نن، به‌ڵام ئه‌مه‌ بۆ چه‌نده‌مینجاره‌ ئه‌و بۆمبانه‌ به‌ تیرۆرستانی داعش خۆیاندا ده‌ته‌قێته‌وه‌و زیان به‌ خۆیان ده‌گات، له‌وڕووه‌شه‌وه‌ خۆشبه‌ختانه‌ له‌و رووداوانه‌دا پێشمه‌رگه‌ هیچ زیانێكیان پێنه‌گه‌یشتووه‌.

PUKmedia  هه‌ڵمه‌ت خانه‌قینی