رێگه‌ نادرێت موڵكی گشتی بۆ خزمه‌تی تاكه‌كه‌س به‌كاربێت

هه‌ڵمه‌ته‌كه‌ به‌رده‌وام ده‌بێت له‌پێناو داكۆكی كردن له‌ به‌رژه‌وه‌ندی گشتی

لیژنه‌هاوبه‌شه‌كانی قائیمقامیه‌تی سلێمانی هه‌ڵمه‌تێكی به‌رفراوانیان ده‌ستپێكردووه‌ بۆ لابردنی هه‌موو ئه‌و كۆشك و عه‌ره‌بانانه‌ی كه‌ به‌شێوه‌ی زیاده‌ڕۆیی دانراون، له‌و چوارچێوه‌یه‌شدا لیژنه‌كان به‌هاوبه‌شی له‌گه‌ڵ تیمه‌كانی سه‌رۆكایه‌تی شاره‌وانی و پۆلیس له‌ناوچه‌ی سه‌رچنار و شه‌كره‌كه‌و چه‌ند شوێنێكی تری شاری سلێمانی هه‌موو ئه‌و كۆشك و عه‌ره‌بانانه‌یان لابرد كه‌ به‌شێوه‌ی زیاده‌ڕیی له‌سه‌ر زه‌وی حكومه‌ت كاریان ده‌كرد.

سۆران عه‌بدول غه‌فور سه‌رۆكی لیژنه‌هاوبه‌شه‌كانی قائیمقامیه‌تی سلێمانی به‌ PUKmedia ی راگه‌یاند: له‌سه‌ر فه‌رمانی قائیمقامی سلێمانی هه‌ڵمه‌تێكی به‌رفراوانیان ده‌ستپێكردووه‌ بۆ لابردن و رێگریكردن له‌كاركردنی ئه‌و كۆشك و عه‌ره‌بانانه‌ی كه‌ به‌شێوه‌ی زیاده‌ڕۆیی له‌سه‌ر موڵكی گشتی كارده‌كه‌ن و زه‌وی حكومه‌ت بۆ به‌رژه‌وه‌ندی خۆیان به‌كار ده‌هێنن .

 ئاماژه‌ی بۆ ئه‌وه‌شكرد: له‌گه‌ڵ لابردنی كۆشك و عه‌ره‌بانه‌كاندا هه‌موو ئه‌و دوكان و ماركێتانه‌ش كه‌ زیاده‌ڕۆیی ده‌كه‌ن و شۆسته‌و موڵكی گشتی به‌كار ده‌هێنن رێگه‌یان پێنادرێت و به‌ڵێننامه‌یان لێوه‌رگیراوه‌ كه‌ له‌كه‌مترین ماوه‌دا پابه‌ندبن به‌و سنوره‌ی كه‌بۆیان ده‌ستنیشان كراوه‌ .

سه‌رۆكی لیژنه‌هاوبه‌شه‌كانی قائیمقامیه‌تی سلێمانی وتیشی: سه‌رباری ئه‌وه‌ی ئه‌و شوێنانه‌ موڵك و ماڵی گشتیان بۆ به‌رژه‌وه‌ندی خۆیان به‌كارهێناوه‌، هاوكات به‌هۆی دانانی كه‌ره‌سته‌و مه‌واده‌كانیانه‌وه‌ له‌سه‌ر شۆسته‌ و شه‌قامه‌كانیان ئاسته‌نگ و گرفتی زۆریان له‌به‌رده‌م هاتووچۆی هاووڵاتیاندا دروستكردووه‌.

راشیگه‌یاند: به‌كارهێنانی موڵكی گشتی و زیاده‌ڕۆیی كارێكی نایاساییه‌و به‌هیچ شێوه‌یه‌كی رێگه‌ی پێنادرێت .

سۆران عه‌بدول غه‌فور باسی له‌وه‌شكرد: له‌ یه‌كه‌م هه‌ڵمه‌تماندا له‌ ناوچه‌ی سه‌رچنار و شه‌كره‌كه‌و چه‌ند شوێنێكی تر ژماره‌یه‌كی زۆر كۆشك و دووكان و عه‌ره‌بانه‌ی زیاده‌ڕۆییان لابراون.

وتشی: هه‌ڵمه‌ته‌كه‌یان به‌رده‌وام ده‌بێت و له‌پێناو داكۆكی كردن له‌ به‌رژه‌وه‌ندی گشتی و هه‌موو ئه‌و شوێنانه‌ی زیاده‌ڕۆیی تێدا ده‌كرێت لاده‌برێن و رێگه‌ به‌ كاركردنیان نادرێت.

ئه‌وه‌شی خسته‌ڕوو: هه‌ر كه‌سێك پابه‌ند نه‌بێت به‌ بڕیاره‌كان سه‌رباری لابردنی زیاده‌ڕۆییه‌كه‌ی رووبه‌ڕووی سزای یاسایش ده‌بێته‌وه‌.

PUKmedia تایبه‌ت