پێشمه‌رگه‌ گوندی كانی ماسی بچووك كۆنترۆڵ ده‌كاته‌وه‌

هه‌ر زوو پێشمه‌رگه‌ لێیان هاتنه‌ ده‌ست و تێكیان شكاندن

دوای دروستبوونی ئاڵۆزی و شه‌ڕ له‌نێوان هێزه‌كانی پێشمه‌رگه‌ و چه‌كداره‌كانی داعش له‌ناوچه‌ی ئه‌نوار كۆباشی له‌گوندی كانی ماسی بچووك كه‌نزیكه‌ له‌ناوچه‌ی ئیمام وه‌یسه‌وه‌، هێزه‌كانی پێشمه‌رگه‌ چه‌كداره‌كانی داعش تێكده‌شكێنن.

مه‌حمود سه‌نگاوی فه‌رمانده‌یی گشتی هێزه‌كانی پێشمه‌رگه‌ له‌میحوه‌ری گه‌رمه‌سێر به‌ pukmedia ی راگه‌یاند: ژماره‌یه‌ك چه‌كداری داعش كه‌ سێ ئۆتۆمبێلیان پێبوو، ویستویانه‌ په‌لاماری پێشمه‌رگه‌ بده‌ن له‌ناوچه‌ی كۆباشی، به‌ڵام هه‌رزوو پێشمه‌رگه‌ لێیان هاتنه‌ ده‌ست و تێكیان شكاندن.
 
وتیشی: دوای ئه‌وه‌ی چه‌كداره‌كانی داعش چونه‌ته‌ نێو گوندی كانی ماسی بچووكه‌وه‌، به‌ڵام هێزه‌كانی پیشمه‌رگه‌ نه‌وه‌ستاون و ئه‌و گونده‌شیان لێسه‌ندونه‌ته‌وه‌و كۆنترۆڵیان كردوه‌و له‌ئێستادا هێزه‌كانی پێشمه‌رگه‌ سه‌رقاڵی پاككردنه‌وه‌ین.

ئه‌وه‌شی خسته‌ڕوو: چه‌كداره‌كانی داعش به‌ره‌و ناو ناحیه‌ی سه‌عدیه‌ هه‌ڵهاتوون و زیانی زۆریان به‌ركه‌وتووه‌ و له‌ئێستادا ته‌نها ناو به‌ناو له‌دوره‌وه‌ ته‌قه‌ ده‌كه‌ن.

له‌باره‌ی وره‌ی پێشمه‌رگه‌وه‌ فه‌رمانده‌یی گشتی هێزه‌كانی پێشمه‌رگه‌ له‌میحوه‌ری گه‌رمه‌سێر وتی: وره‌ی پێشمه‌رگه‌ زۆر به‌رزه‌و به‌ته‌واوه‌تی چه‌كداره‌كانی داعشیان لاواز كردووه‌.

PUKmedia سامان یاروه‌یس