له‌شه‌نگال ته‌واوی ئه‌ندامان و كادیرانی كۆمیته‌یه‌كی یه‌كێتیی له‌سێداره‌دراون

زیاتر له‌ 700 كه‌س له‌لایه‌ن چه‌كداره‌كانی داعشه‌وه‌ له‌سێداره‌ دراون

له‌ گوندی كۆچۆ، ته‌واوی ئه‌ندامان و كادیران و لایه‌نگرانی یه‌كێتیی نیشتمانیی كوردستان له‌ كۆمیته‌ی كۆچۆ به‌ده‌ستی چه‌په‌ڵی تیرۆرستانی داعش شه‌هیدكراون و خێزانه‌كانیشیان براون.
 
له‌وباره‌یه‌وه‌ خه‌یری شه‌نگالی جێگری مه‌ڵبه‌ندی موسڵی یه‌كێتیی نیشتمانیی كوردستان به‌ PUKmedia ی رایگه‌یاند: له‌ رووداوه‌كه‌ی گوندی كۆچۆی سه‌ر به‌قه‌زای شه‌نگال كه‌ زیاتر له‌ 700 كه‌س له‌لایه‌ن چه‌كداره‌كانی داعشه‌وه‌ له‌سێداره‌ دران، ته‌واوی ئه‌ندامان و كادیران و لایه‌نگرانی كۆمیته‌ی كۆچۆی (ی.ن.ك) له‌لایه‌ن چه‌كداره‌كانی داعشه‌وه‌ گولـله‌ باران كراون و شه‌هیدبوون، سه‌رجه‌م خێزانه‌كانیشیان به‌ره‌و شوێنێكی نادیاربراون.

وتیشی: كوڕی ئه‌نجومه‌نی گونده‌كه‌ كه‌ ناوی (شه‌هاب ئه‌حمه‌د جاسۆ)یه‌و به‌رپرسی كۆمیته‌ی كۆچۆ بووه‌ به‌ به‌رچاوی كه‌سوكاره‌كه‌یه‌وه‌ به‌شێوه‌یه‌كی دڕندانه‌ شه‌هیدكراوه‌، له‌گه‌ڵ زیاتر له‌ 400  ئه‌ندام كۆمیته‌و كادیرو لایه‌نگری (ی.ن.ك).

رونشیكرده‌وه‌: دواتر چه‌كداره‌كانی داعش به‌ ئۆتۆمبێلی بارهه‌ڵگر ته‌واوی سه‌روه‌ت و سامان و ماڵ و موڵكی دانیشتوانی گونده‌كه‌یان باركردوه‌و به‌ره‌و سوریا بردوویانه‌و ماڵه‌كانیشیان ته‌قاندووه‌ته‌وه‌و گونده‌كه‌یان سوتاندووه‌.

خه‌یری شه‌نگالی وتیشی: وه‌كو ئێزیدییه‌كانی شه‌نگال چه‌كمان هه‌ڵگرتووه‌و به‌هیچ شێوه‌یه‌ك له‌ تیرۆرستانی داعش خۆش نابین و له‌ماوه‌ی مانگی رابردوودا زیانی زۆرمان پێگه‌یاندون و تۆڵه‌ی ته‌واوی ئه‌و زوڵمانه‌ ده‌كه‌ینه‌وه‌ كه‌ به‌رامبه‌ر به‌ برا ئێزیدییه‌كان كراوه‌.

PUKmedia  سامان یاروه‌یس