تیرۆرستان به‌ئۆتۆمبێلی بۆمبڕێژكراو و هاوه‌ن هێرشده‌كه‌ن سه‌ر كازمیه‌

ژماره‌یه‌ك ئۆتۆمبێل سوتاون

شه‌وی رابردوو له‌ به‌غدای پایته‌خت، به‌هۆی ته‌قینه‌وه‌ی ئۆتۆمبێلی بۆمبڕێژكراو و كه‌وتنه‌وه‌ی چه‌ند هاوه‌نێك له‌ ناوچه‌ی كازمیه‌، ژماره‌یه‌ك هاووڵاتی شه‌هید و برینداربوون، ژماره‌یه‌ك ئۆتۆمبێل سوتاون.

سه‌رچاوه‌یه‌كی تایبه‌ت به‌ PUKmedia ی راگه‌یاند: له‌ نزیك ژماره‌یه‌ك له‌ چێشتخانه‌كانی ناوچه‌ی كازمیه‌، ئۆتۆمبێلێكی بۆمبڕێژكراو ته‌قیوه‌ته‌وه‌و به‌هۆیه‌وه‌ 31 كه‌س شه‌هیدو برینداربوون.

وتیشی: له‌هه‌مانكاتیشدا ئۆتۆمبێلێكی بۆمبڕێژكراوله‌ نزیك (مقر الشعبه‌ الخامسه‌) ته‌قیوه‌ته‌وه‌و به‌هۆیه‌وه‌ ژماره‌یه‌كی تر له‌ هاووڵاتی شه‌هیدو برینداربوون و هه‌روه‌ها ژماره‌یه‌ك ئۆتۆمبێلیش سوتاون.

ئه‌و سه‌رچاوه‌یه‌ راشیگه‌یاند: له‌لایه‌ن تیرۆرستانه‌وه‌ 15 هاوه‌ن نراوه‌ به‌ ناوچه‌ی كازمیه‌وه‌، به‌هۆیه‌وه‌ زیاتر له‌ 20 كه‌س شه‌هیدو برینداربوون.

له‌لایه‌كی تریشه‌وه‌ له‌سه‌ر رێگه‌ی سه‌ره‌كی ناوچه‌ی (الگوبجی) ئۆتۆمبێلێكی بۆمبڕێژكراو ته‌قیوه‌ته‌وه‌و به‌هۆیه‌وه‌ 7 كه‌س شه‌هیدبوون و 5 كه‌سیش برینداربوون.

PUKmedia  شه‌یما تاڵه‌بانی / به‌غدا