ئازاد ھه‌ورامی و كه‌ركوك و كوردستان

٣١ی ئابی ١٩٨٨ چووه‌ ریزی نه‌مرانه‌وه‌و شه‌ھید بوو

٣١ی ئابی ١٩٨٨ سه‌ركرده‌ی گه‌نج و خوێنده‌وار ئازاد ھه‌ورامی له‌ دوایین رۆژه‌كانی شاڵاوی ئه‌نفالدا له‌نێو ھه‌ڤاڵ و ھاوسه‌نگه‌ره‌كانیدا چووه‌ ریزی نه‌مرانه‌وه‌و شه‌ھید بوو، یه‌كێتی نیشتمانی كوردستان له‌ ناساندنی شه‌ھیده‌ گیانفیداكانی به‌گشتی و، رێبه‌ره‌ یشه‌ھیده‌كانیشیدا به‌ سه‌رجه‌م خه‌ڵكی كوردستان و نه‌وه‌ی نوێ به‌تایبه‌تی كه‌مته‌رخه‌م بووه‌، ئه‌و حزبه‌ی ده‌یان سه‌ركرده‌ی له‌مه‌یدانه‌كانی به‌رگریی و په‌لاماردانی به‌عس و فاشتسته‌كاندا بوونه‌ كۆچی قوربانی، ھێشتا نه‌یتوانیوه‌ مێژووه‌كه‌ی تۆمار بكات! ئازاد ھه‌ورامی گیتار ژه‌ن و ده‌نگ خۆش و له‌گه‌نجترین سه‌ركرده‌كانی كۆمه‌ڵه‌و یه‌كێتی به‌نازناوی ھه‌ورامی و به‌ نوری كه‌ركوكه‌وه‌ له‌ ناو گه‌رمه‌ی دروستكردنی شانه‌كانی ناو شارو ھه‌ڵگیرساندنه‌وه‌ی شۆڕش و رووبه‌رووبوه‌نه‌وه‌كاندا بووه‌ ئه‌ستێره‌یه‌كی دره‌وشانه‌ی سه‌رده‌مه‌كه‌ی خۆی، له‌وساوه‌ بۆ ئێستاش نه‌توانراوه‌ جێگای ئه‌و مێرخاسه‌ پڕ بكرێته‌وه‌، ئه‌مه‌ وته‌ی ئه‌وانه‌شه‌ كه‌ له‌نزیكه‌وه‌ ئه‌ویان ناسیوه‌، ئێستا كوردستان و كه‌ركوك و یه‌كێتی پێویستی به‌ سه‌كرده‌ی وه‌ك كاك ئازاده‌ بۆ ئه‌م قۆناغه‌ له‌ پێناو گه‌ڕانه‌وه‌ بۆ سه‌ره‌تاكان، بۆ ناو خه‌ڵك و خانووه‌ قوڕه‌كان، بۆ نێو بۆته‌ی كه‌فو كوڵی باوه‌گوڕگوڕو ره‌حیماوا بۆ لای مناڵانی سه‌ر قوتیلكه‌ تاشی له‌یلان، ئازاد ھه‌ورامی به‌ ئاكارو ره‌فتارو ھه‌ڵوێست سه‌ركرده‌ی نمونه‌یی بوو، ئه‌و ده‌مانه‌ی ئه‌و كاتانه‌ی سه‌ركردایه‌تیكردن له‌ناو ئه‌م رێكخراوه‌ گه‌وره‌یه‌دا سانا نه‌بوو، ئه‌و به‌و ته‌مه‌نه‌وه‌ پێشڕه‌ویی سیاسیی و سه‌ربازیی و رووناكبیریی ده‌كرد، كوا په‌یمانگاكانی پێگه‌یاندن؟ كوا جۆشدانه‌وه‌ی سرودی (رێی خه‌باتمان)؟ كوا ئاوازه‌ پڕ جۆشه‌كانی كوا؟؟ سه‌د حه‌یف و ھه‌زاران مه‌خابن.

ئه‌وه‌ی جێی دڵخۆشیه‌ ئه‌مڕۆ كه‌ركوك و كوردستان ئازادن، به‌ڵام پێویستمان به‌ گه‌ڕانه‌وه‌شه‌ بۆ لای یادو یاده‌وریه‌ شرینه‌كانی سه‌ره‌تای كاروانه‌كه‌، ئاوڕدانه‌وه‌ له‌ رابردوو بۆ دیتنی وێنه‌و ئه‌دگاری ئازیزه‌ له‌ده‌ستچووه‌كان بۆ لای رووباره‌ خوێنه‌كه‌ كه‌  ئێسته‌ش خوێنی نوێی لێ ده‌چۆڕێت له‌پێناو ئاینده‌یه‌كی باشتر له‌ھه‌موو سه‌رده‌مێك پێویستره‌.

یادو یاده‌وه‌ریی ئازاد ھه‌ورامی و سه‌رجه‌م شه‌ھیدانی رێگای كوردو كوردستان به‌رزو پیرۆز بێت.

سالار مه‌حمود