سه‌رۆك كۆمارو وه‌فدێكی لیستی وه‌ته‌نیه‌ كۆده‌بنه‌وه‌

گفتوگۆكرا له‌ باره‌ی پێشهات و باری سیاسی وڵات و هه‌وڵه‌كان بۆ پێكهێنانی حكومه‌ت

ئه‌مڕۆ 1-9-2014 فه‌خامه‌تی سه‌رۆك كۆمار د.فوئاد مه‌عسوم له‌ كۆشكی سه‌لام پێشوازیكرد له‌ وه‌فدێكی لیستی وه‌ته‌نیه‌ به‌ سه‌رۆكایه‌تیی د.عه‌دنان جه‌نابی.

له‌ دیدارێكدا گفتوگۆكرا له‌ باره‌ی پێشهات و باری سیاسی وڵات و هه‌وڵه‌كان بۆ پێكهێنانی حكومه‌ت، كه‌ نوێنه‌رایه‌تی نیشتمانی فراوان بكات له‌سه‌ر بنه‌مای شاره‌زایی و تواناو پاكێتی، هه‌روه‌ها ئه‌و رێوشوێنانه‌ش باسكران بۆ زه‌مینه‌سازی به‌شداریكردنی سه‌ركرده‌ سیاسییه‌كان له‌ بازنه‌ی بڕیاردانی نیشتمانی، ئه‌وه‌ش فاكته‌رێكه‌ تا ئه‌و سه‌ركرده‌و سه‌رۆك حزبانه‌ رۆڵی زیندوو و كارایان هه‌بێت له‌ ئیداره‌دانی ده‌وڵه‌تدا، ده‌ره‌نجامه‌كه‌ی په‌ره‌ به‌ رۆڵی حكومه‌ت ده‌دات و تواناكانی راپه‌ڕاندن به‌هێزتر ده‌بێت و كاره‌كان بێ كۆسپ رایی ده‌بن.

له‌ به‌رامبه‌ردا، وه‌فده‌كه‌ ده‌ستخۆشیان له‌ ده‌ستپێشخه‌رییه‌كانی فه‌خامه‌تی سه‌رۆك كۆمار كرد له‌ بواری ئاشتبوونه‌وه‌ی گشتی و ئه‌نجومه‌نی نیشتمانی بۆ سیاسه‌ته‌ باڵاكان، كه‌ ئومێد ده‌كرێت سه‌ركرده‌و كه‌سایه‌تییه‌كانی ناو هێزو لایه‌نه‌كانی ئه‌نجومه‌نی نوێنه‌ران و ده‌ره‌وه‌ی له‌خۆبگرێت، هاوكات پێدانی رۆڵ به‌ ئه‌نجومه‌نی باڵای به‌رگری كه‌ سه‌رۆك كۆماری ته‌ئكیدی له‌سه‌ركردووه‌ته‌وه‌.

ئه‌ندامانی وه‌فده‌كه‌ روانین و بیركردنه‌وه‌ی لیستی وه‌ته‌نیه‌یان خسته‌ڕوو له‌ باره‌ی سروشتی كارنامه‌ی حكومی، هه‌روه‌ها پێویستی ده‌سته‌به‌ركردنی زه‌مانه‌تی جێبه‌جێكردنی به‌رنامه‌كه‌شیان دووپاتكرده‌وه‌، داوای گرنگی هه‌ماهه‌نگیشیان كرد له‌ نێوان پرۆسه‌ ئه‌منییه‌كان و چالاكییه‌ كۆمه‌ڵایه‌تییه‌كان و سازدانی شه‌قام و رای گشتی له‌ هه‌موو ناوچه‌كاندا بۆ ئه‌م جه‌نگه‌ی ئێستا له‌دژی تیرۆر.

PUKmedia