كۆسره‌ت ره‌سوڵ: پێشمه‌رگه‌ له‌ جیاتی سه‌رجه‌م مرۆڤایه‌تی ده‌جه‌نگێت

ئاسۆی ڕۆژێكی نوێی پڕ به‌خته‌وه‌ری له‌م وڵاته‌دا هه‌ڵدێت

ئه‌مڕۆ 30-8-2014 كۆسره‌ت ره‌سوڵ عه‌لی جێگری سه‌رۆكی هه‌رێمی كوردستان به‌یاوه‌ری د.به‌رهه‌م ئه‌حمه‌د ساڵح و شاڵاو كۆسره‌ت ره‌سوڵ عه‌لی، به‌مه‌به‌ستی به‌سه‌ر كردنه‌وه‌ی بارودۆخی میحوه‌ره‌كانی شه‌ڕی پێشمه‌رگه‌ی كوردستان دژی تیرۆریستانی داعش، سه‌ردانی شاری خانه‌قینی كرد و له‌گه‌ڵ به‌رپرسه‌ سیاسی و فه‌رمانده‌ سه‌ربازییه‌كاندا كۆبونه‌وه‌یه‌كی ئه‌نجامدا.

له‌و كۆبونه‌وه‌یه‌دا هه‌ریه‌كه‌ له‌ مه‌لابه‌ختیار به‌رپرسی ده‌سته‌ی كارگێڕی مه‌كته‌بی سیاسی یه‌كێتیی نیشتمانیی كوردستان و مه‌حمود سه‌نگاوی ئه‌ندامی مه‌كته‌بی سیاسی و به‌رپرسی میحوه‌ری جه‌له‌ولای هێزی پێشمه‌رگه‌ی كوردستان و شێخ جه‌عفه‌ر شێخ مسته‌فا فه‌رمانده‌ی هێزه‌كانی حه‌فتا و ژماره‌یه‌ك له‌ئه‌ندامانی سه‌ركردایه‌تی یه‌كێتیی نیشتمانیی كوردستان ئاماده‌ی كۆبونه‌وه‌كه‌بوون.

له‌ كۆبونه‌وه‌كه‌دا جێگری سه‌رۆكی هه‌رێمی كوردستان ده‌ست خۆشی له‌ سه‌رجه‌م فه‌رمانده‌ و به‌رپرسه‌كانی پێشمه‌رگه‌ له‌و میحوه‌ره‌دا كردو به‌ڵێنی هاوكاری وپشتیوانی زیاتری پێدان .

پاشان كۆسره‌ت ره‌سول عه‌لی جێگری سه‌رۆكی هه‌رێم به‌ره‌و میحوه‌ری حسینیه‌ی نه‌قشبه‌ندی به‌ڕێكه‌وت و له‌ نزیكه‌وه‌ پێشمه‌رگه‌كانی به‌سه‌ركرده‌وه‌ .

له‌ وته‌یه‌كیدا بۆ پێشمه‌رگه‌ قاره‌مانه‌كان، جێگری سه‌رۆكی هه‌رێم وتی: من له‌ هه‌موو سه‌رده‌م و بارودۆخێكدا شانازیم به‌ ئێوه‌وه‌ كردوه‌و به‌رده‌وام خۆم به‌ یه‌كێك له‌ ئێوه‌ زانیوه‌، ئه‌و گیانفیدایی و قاره‌مانه‌تیه‌ی ئێوه‌ لوتكه‌ی له‌ خۆبورده‌یی و به‌خشنده‌یی مرۆڤی كورده‌ بۆ خۆبه‌ختكردن له‌ پێناو خاكه‌كه‌یدا، ئه‌م شه‌ڕه‌ی روبه‌ڕوومان بۆته‌وه‌ ته‌نها شه‌ڕی نیشتمان نیه‌ به‌ڵكو جه‌نگه‌ دژی دواكه‌وتوییی فیكری و جه‌نگه‌ دژی به‌تاڵانبردنی خاك و نیشتمان و شه‌ره‌ف و ناموسی ئه‌م نه‌ته‌وه‌یه‌، ئێوه‌ له‌ جیاتی سه‌رجه‌م مرۆڤایه‌تی ده‌جه‌نگن، له‌ جیاتی ئازادیخوازان و نوێخوازان و ئاشتی خوازانی جیهان ده‌جه‌نگن.

له‌ درێژه‌ی وته‌كانیدا كۆسره‌ت ره‌سوڵ جه‌ختیكرده‌وه‌: به‌ڕاستی ئێوه‌ پێشڕه‌و و پێشه‌وای جه‌نگی دژه‌تیرۆری جیهانین، هه‌ر بۆیه‌ دڵنیاتان ده‌كه‌مه‌وه‌ ئێمه‌ له‌م شه‌ڕه‌دا سه‌رده‌كه‌وین، وابه‌ره‌ی جه‌نگی دژه‌تیرۆر فراوانتر و كاریگه‌رتر ده‌بێت و ئاسۆی ڕۆژێكی نوێی پڕ به‌خته‌وه‌ری له‌م وڵاته‌دا هه‌ڵدێت.

له‌ به‌شێكی دیكه‌ی وته‌كانیدا جێگری سه‌رۆكی هه‌رێم وتی: من وه‌كو جاری جاران له‌گه‌ڵ ئێوه‌ و وه‌ك ئێوه‌ پێشمه‌رگه‌م و ئاماده‌م تادوا هه‌ناسه‌ له‌گه‌ڵتاندا به‌رامبه‌ر تیرۆریستان بجه‌نگم و به‌ته‌واوی توانامه‌وه‌ هاوكار و پیشت و په‌نای ئێوه‌ی قاره‌مانم.

پاشان د.به‌رهه‌م ئه‌حمه‌د ساڵح له‌وته‌یه‌كیدا بۆ پێشمه‌رگه‌ قاره‌مانه‌كان وتی: خۆڕاگری و به‌رگری كردنی ئێوه‌ له‌ خاكی كوردستان جێگای شانازی و سه‌ربه‌رزییه‌ بۆ ئێمه‌ و هه‌موو گه‌لی كورد، قاره‌مانێتی ئێوه‌ له‌ هه‌موو كوردستان ده‌نگی داوه‌ته‌وه‌، بۆیه‌ جێگای ڕێز و ده‌ست خۆشییه‌ من سه‌ربه‌رزم به‌یه‌ك به‌یه‌كتان.

لای خۆیانه‌وه‌ پێشمه‌رگه‌قاره‌مانه‌كانی كوردستانیش به‌بینینی كۆسره‌ت ره‌سوڵ عه‌لی فه‌رمانده‌ی رۆژه‌ سه‌خت و شه‌ڕه‌سه‌خته‌كان وره‌ی پۆڵاینیان به‌رزتر بۆوه‌ و به‌ڵێنیان به‌سه‌رۆكی هه‌رێمدا تاكو دوا دڵۆپی خوێنیان پارێزگاری له‌ خاك و نیشتمانه‌كه‌یان بكه‌ن.

PUKmedia