riklam

لیژنه‌ی به‌جینۆساید ناساندنی كوردانی ئێزیدی كۆده‌بنه‌وه‌

kurdistani 01:52 PM - 2014-08-28
دووه‌مین كۆبوونه‌وه‌یان ئه‌نجامدا

دووه‌مین كۆبوونه‌وه‌یان ئه‌نجامدا

له‌ژێر رۆشنایی بڕیاری ئه‌نجومه‌نی وه‌زیران ژماره‌ (5170) له‌ رۆژی (21/8/2014) بۆ به‌جینۆساید ناساندنی تاوانی كۆمه‌ڵكوژی كوردانی ئێزیدی و پێكهاته‌ نه‌ته‌وه‌یی و ئایینیه‌كانی كوردستان، رۆژی 27/8/2014 لیژنه‌ی باڵای ناساندن له‌ ته‌لاری ئه‌نجومه‌نی وه‌زیران به‌ سه‌رپه‌رشتی مه‌حمود حاجی ساڵح وه‌زیری كاروباری شه‌هیدان و ئه‌نفالكراوانی حكومه‌تی هه‌رێمی كوردستان و سه‌رۆكی لیژنه‌، دووه‌مین كۆبوونه‌وه‌یان ئه‌نجامدا.

له‌ سه‌ره‌تادا سه‌رۆكی لیژنه‌ كۆنووسی دانیشتنی یه‌كه‌مین كۆبوونه‌وه‌و به‌رنامه‌ی كاری كۆبوونه‌وه‌كه‌ی خسته‌ڕوو، تیایدا ئاماژه‌ی به‌ هه‌ردوو پرۆژه‌ی وه‌زاره‌تی كاروباری شه‌هیدان و ئه‌نفالكراوان و فه‌رمانگه‌ی په‌یوه‌ندییه‌كانی ده‌ره‌وه‌ی ئه‌نجومه‌نی وه‌زیران كرد، كه‌ لیژنه‌ی تایبه‌ت ئاماده‌یان كردبوو و هه‌ڵوه‌سته‌یان له‌سه‌ركرا.

له‌وڕووه‌وه‌ به‌ تێروته‌سه‌لی بابه‌ته‌كانی به‌رنامه‌ی كار گفتۆگۆی له‌سه‌ركراو به‌باشزانرا كه‌ لایه‌نه‌ په‌یوه‌ندیداره‌كانی حكومه‌تی هه‌رێم وه‌كو ئه‌نجومه‌نی دادی و ئاماری هه‌رێم و وه‌زاره‌تی ناوخۆو لایه‌نه‌كانی تر، به‌شداربن له‌ كاره‌كان تا رێچكه‌ی لێكۆڵینه‌وه‌و كۆكردنه‌وه‌ی به‌ڵگه‌كان و گه‌یاندنی به‌ دادگای باڵا شێوه‌یه‌كی دروست و نێوده‌وڵه‌تی به‌خۆیه‌وه‌ بگرێت و ناكۆك نه‌بێت و له‌گه‌ڵ رێڕه‌وی دادگای باڵای تاوانی نێوده‌وڵه‌تی هاوڕێك بێت.

هه‌ر له‌ كۆبوونه‌وه‌كه‌دا بڕیاردرا قسه‌ له‌گه‌ڵ ئه‌نجومه‌نی دادوه‌ری بكرێت بۆ دیاریكردنی تیمی لێكۆڵینه‌وه‌ی تایبه‌ت و سوودوه‌رگرتن له‌ شاره‌زایانی بواری كۆمه‌ڵایه‌تی و لێكۆڵینه‌وه‌و ئه‌گه‌ر پێویستی كرد خولی خێرایان بۆ بكرێته‌وه‌، هه‌روه‌ها له‌ رێگه‌ی ئیمێلی (وێب سایتی تایبه‌ت لیژنه‌كه‌ زانیاری وه‌رده‌گرێت و بڵاوكراوه‌كانی خۆی بڵاوده‌كاته‌وه‌، داوا له‌ هه‌موو لایه‌نه‌كانیش ده‌كات ئه‌وانه‌ی زانیاری یان گرته‌ی ڤیدیۆیی یان وێنه‌یان هه‌یه‌، پێشكه‌شی لیژنه‌كه‌ی بكه‌ن تا له‌ رێڕه‌وی لێكۆڵینه‌وه‌ سوودی لێببیندرێت و بڕیاردرا راگه‌یاندراوێك بۆ بڵاوكردنه‌وه‌ی ناونیشانی ئیمێل و وێب سایته‌كه‌ بكرێت).

له‌ كۆتایی كوبوونه‌وه‌كه‌شدا بڕیاردرا لیژنه‌كه‌ هه‌فته‌ی داهاتوو سه‌ردانی دهۆك بكات تا له‌نزیكه‌وه‌ ئاگاداری ره‌وشی ئاواره‌كانی شه‌نگال بێت و چاوی پێیان بكه‌وێت.

PUKmedia  فوئاد عوسمان

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket