هه‌ڵه‌بجه‌.. شه‌هید مامۆ ره‌شه‌ به‌خاك سپێرا

ئه‌م ئه‌زمونه‌ی ئه‌مڕۆ هه‌یه‌ به‌رهه‌می خوێنی سه‌دان هه‌زار شه‌هیده

به‌ ئاماده‌بوونی ژماره‌یه‌ك له‌ئه‌ندامانی سه‌ركردایه‌تی یه‌كێتی نشتیمانی كوردستان و ژماره‌یه‌ك له‌ فه‌رمانده‌ سه‌ربازیه‌كانی هێزی پێشمه‌رگه‌و قائیمقامی هه‌ڵه‌بجه‌ و  كادیرانی سنوری مه‌ڵبه‌ندی رێكخستنی  9 ی شاره‌زوور و هاوڕێ و هاوسه‌نگه‌ران و دانیشتوانی شاری هه‌ڵه‌بجه‌ ته‌رمی فه‌رمانده‌و پێشمه‌رگه‌ عه‌قید (ره‌شید ئه‌حمه‌د) ناسراوه‌ به‌ مامۆ ره‌شه‌ له‌گۆڕستانی عه‌بابه‌یلێ و له‌مه‌راسیمێكدا به‌خاك سپێرا .

 مه‌راسیمه‌كه‌ به‌چه‌ند ده‌قیقه‌یه‌ك وه‌ستان بۆ گیانی پاكی شه‌هید، ده‌ستیپێكردو پاشان وتاری حه‌مه‌ی حه‌مه‌ سه‌عید ئه‌ندامی سه‌ركردایه‌تی (ی ن ك) خوێنرایه‌و تیایدا وێسته‌گانی ژیانی مامۆ ره‌شه‌ له‌ژیانی سیاسی و كۆمه‌ڵایه‌تیدا خسته‌ڕوو.

حه‌مه‌ی حه‌مه‌سه‌عید ئه‌ندامی سه‌ركردایه‌تی یه‌كێتیی نشتیمانیی كوردستان له‌ لێدوانێكدا به‌ PUKmedia ی  راگه‌یاند: ئه‌م ئه‌زموونه‌ی ئه‌مڕۆ له‌ كوردستاندا هه‌یه‌ روون و ئاشكرایه‌ به‌رهه‌می خوێنی سه‌دان هه‌زار شه‌هیده‌ كه‌ گیانی خۆیان به‌ خشیوه‌ته‌ نیشتیمانه‌كه‌یان، ئه‌مڕۆش كه‌ نیشتیمان له‌ژێر مه‌ترسیدایه‌ ئه‌ركی هه‌موومانه‌ به‌رگری لێبكه‌ین .

وتیشی: مامه‌ ره‌شه‌  هه‌میشه‌ به‌ نموونه‌ی پێشمه‌رگه‌و كه‌سی نیشتیمان په‌روه‌ر هێنراوه‌ته‌وه‌ له‌ژیانی پێشمه‌رگایه‌تیدا، نموونه‌ بوو هه‌رگیز سڵی له‌ نه‌یارانی گه‌له‌كه‌ی نه‌كردۆته‌وه‌، وێرای ئه‌وه‌ی پیاوێكی كۆمه‌ڵایه‌تی قسه‌ خۆشی نێو هاوڕیانی و پێشمه‌رگه‌یه‌كی دانه‌ بڕاوو بوو له‌ خه‌باتی گه‌له‌كه‌یدا .

سه‌لاح گریانه‌یی هاو سه‌نگه‌ری شه‌هیدو به‌شداربووی شه‌ڕی ئه‌مڕۆ له‌گه‌ڵ گروپی تیرۆستی داعش له‌ لێدوانێكدا به‌ PUKmedia ی راگه‌یاند: دوای ئه‌وه‌ی په‌لاماری ئه‌و گروپه‌ تیرۆستیه‌ماندا له‌یه‌كێك له‌و مۆڵگانه‌ مامۆ ره‌شه‌ لوله‌ی بیكه‌یسی  سه‌ر مۆڵگه‌كه‌ی به‌ده‌ستگرت، گه‌رچی ئه‌و تیرۆستانه‌ی تیابوون، به‌ڵام له‌و كاته‌دا گوللـه‌یه‌ك به‌ر مامۆ ره‌شه‌ كه‌وت و به‌داخه‌وه‌ گیانی سپارد .

وتیشی: مامو ره‌شه‌ له‌ناو پێشمه‌رگه‌كاندا هه‌میشه‌ به‌ كۆڵه‌كه‌یه‌كی ووره‌ی گه‌وره‌ سه‌یر ئه‌كرا له‌ناو هه‌ر قوڵێكدا بوو بێت هه‌موو پێشمه‌رگه‌كان ووره‌یه‌كی جیاوازتریان هه‌بووه‌  له‌دروستبوونی ئه‌م ئاڵوزیانه‌شه‌وه‌ ده‌یان ده‌رسی به‌و تیروستانه‌ ده‌یا .

بێستون محه‌مه‌د هاوسه‌نگه‌ری مامۆ ره‌شه‌ و به‌شداربووی شه‌ڕی ئه‌مڕۆی جه‌له‌ولا وتی:  مامۆ ره‌شه‌ ده‌یان جار وتویه‌تی هاتوم گیانی خۆم ببه‌خشم به‌م نشتیمانه‌ هه‌روه‌ها بۆ داگیركه‌رانه‌ ئه‌وه‌ بخه‌مه‌روو هه‌رگیز ئه‌وان ئه‌و هێزه‌نین بتوان شه‌ڕی كورد بكه‌ن .

وتیشی: په‌یمان بۆ مامۆ ره‌شه‌ دووپاتده‌كه‌ینه‌وه‌  كه‌ هه‌رگیز واز له‌و رێبازه‌ی نه‌هێنین و بیكه‌یسی سه‌ر ره‌بیه‌كانی دیكه‌ ئێمه‌ بیانگرین و تۆڵه‌ی بكه‌ینه‌وه‌ .

ره‌شید ئه‌حمه‌د ناسراوه‌ به‌ مامۆ ره‌شه‌ له‌ساڵی 1963 له‌گوندی عه‌بابه‌یلێی پارێزگای هه‌ڵه‌بجه‌ له‌خێزانێكی نیشتیمان په‌روه‌ر چاوی گه‌شی به‌ دنیا هه‌ڵهێناوه‌و له‌ساڵی 1987 و له‌ تیپی 11 ی هه‌ورامان و له‌چوار چێوه‌ی رێكخستنه‌ كانی (ی ن ك ) بۆته‌ پێشمه‌رگه‌ و له‌ساڵی 1991 و له‌هێزی پێشمه‌رگه‌ی كوردستان  به‌رده‌وام بووه‌ له‌خه‌بات و له‌ژیانی سیاسیدا ده‌یان پله‌ی سه‌ربازی وه‌رگرتووه‌و دواین پله‌شی عه‌قیدی خانه‌نشین بووه‌، له‌ ریزه‌كانی هێزی پێشمه‌رگه‌ی كوردستان، به‌داخه‌وه‌ سه‌رله‌بانی ئه‌مڕۆ 22-8-2014  له‌ ئان و ساتی هێرشی پێشمه‌رگه‌ بۆ سه‌ر جه‌له‌ولا  گیانی پاكی گه‌یشته‌ كاروانی پڕسه‌روه‌ری شه‌هیدانه‌وه‌ و بۆ هه‌تا هه‌تاش ماڵئاوای له‌ره‌وه‌زو رازو هاوڕێ و خانه‌واده‌كه‌ی كرد  .

PUKmedia فه‌رحان حه‌مه‌خان/ هه‌ڵه‌بجه‌