ئه‌وروپا.. مزگه‌وته‌كان ده‌خرێنه‌ ژێر چاودێری و رێگه‌ له‌ هاندانی گه‌نجان ده‌گیرێت

گه‌نجان به‌ناوی ونبونه‌وه‌ په‌یوه‌ندی به‌ گروپه‌ تیرۆرستیه‌كانه‌وه‌ ده‌كه‌ن‌

ماوه‌یه‌كه‌ دیارده‌یه‌كی زه‌ق له‌شه‌قامه‌كانی ئه‌وروپای رۆژئاوا سه‌ریهه‌ڵداوه‌ ئه‌ویش هه‌ڵواسینی وێنه‌ی گه‌نجانی موسڵمان له‌ شوێنه‌ گشتیه‌كان و له‌سه‌ر ستونی كاره‌باكان كه‌  لێی نووسراوه‌ ئه‌م فڵان كوڕی فڵانه‌و له‌ سه‌عات ئه‌وه‌ندی فڵانه‌ رۆژه‌وه‌ له‌ماڵ چۆته‌ ده‌ره‌وه‌و نه‌گه‌ڕاوه‌ته‌وه‌، تكایه‌  هه‌ر كه‌سێك زانیاریه‌كی له‌سه‌ر ئه‌و وێنه‌یه‌ هه‌یه‌ به‌زووترین كات په‌یوه‌ندی به‌م ژماره‌ ته‌له‌فۆنه‌ بكات یا ده‌زگای پۆلیس ئاگادار بكاته‌وه‌.

 ئه‌م دیارده‌یه‌ زیاتر له‌ وڵاتی به‌لجیكا به‌پله‌ی یه‌كه‌م دێت ئینجا ئه‌ڵمانیاو فه‌ره‌نساو به‌ریتانیاو نه‌مسا  به‌پله‌ی دووه‌م دێن و به‌دوایاندا ووڵاتانی تر.

ئه‌و گه‌نجانه‌ی كه‌ ناو وێنه‌كانیان هه‌ڵده‌واسرێت به‌ پله‌ی یه‌كه‌م به‌ڕه‌چه‌ڵه‌ك خه‌ڵكی وڵاتانی مه‌غریب و جه‌زائیرو تونس و سۆماڵ و لیبیان به‌دوایاندا توركیاو شیشان و بۆسنیا هه‌ندێك وڵاتی تر، ئه‌مانه‌ش به‌شی زۆریان هه‌ڵگری ره‌گه‌زنامه‌ی ئه‌وروپین.

 به‌پێی راپۆرتێك كه‌ له‌ ده‌زگای هه‌واڵگری به‌لجیكی-دا هاتووه‌ ئه‌م گه‌نجانه‌ ون نه‌بوون، به‌ڵكو به‌شێكی زۆریان كه‌سوكاریان زانیارییان سه‌باره‌ت به‌ شوێنی كوڕه‌كانیان هه‌یه‌و نه‌یان توانیه‌ رێگریان لێبكه‌ن یا هه‌ر نه‌یانكردوه‌، هه‌روه‌ها له‌به‌ر فشاری یاسایی و لێپێچینه‌وه‌ لێیان كه‌سوكاریان وا نیشانده‌ده‌ن كه‌ ئه‌وان نازانن رۆڵه‌كانیان له‌كوێین و ده‌چن ده‌زگاكانی پۆلیس ئاگادار ده‌كه‌نه‌وه‌ كه‌ كوڕه‌كانیان ماوه‌ی چه‌ند رۆژێكه‌ نه‌گه‌ڕاونه‌ته‌وه‌ ماڵه‌وه‌و به‌و كاره‌شیان خۆیان له‌ به‌دواچوونه‌ یاساییه‌كان ده‌پارێزن.

 له‌ راپۆرته‌كه‌ی ده‌زگای هه‌واڵگری به‌لجیكی-دا ئاماژه‌ بۆئه‌وه‌شكراوه‌ ئه‌م گه‌نجانه‌ی به‌وشێوه‌یه‌ ون ده‌بن ئه‌وانه‌ له‌سه‌ر خاكی ئه‌وروپادا نامێنن و رووده‌كه‌نه‌  سوریاو عیراق و به‌ناوی جیهادكردنه‌وه‌ په‌یوه‌ندی به‌ ریزی گروپه‌ تیرۆرستیه‌كانه‌وه‌ ده‌كه‌ن.

هه‌ر به‌پێی زانیارییه‌كانی نێو راپۆرته‌كه‌، ئێستا ئه‌وروپا به‌شێكی زۆری ئه‌و مزگه‌وتانه‌ی خستۆته‌ژێر چاودێری و رێگه‌گرتن له‌و جۆره‌ خوتبانه‌ی هه‌ینی كه‌ هانی گه‌نجانی موسڵمان ده‌ده‌ن بۆ كاری توندو تیژی په‌یوه‌ندیكردن به‌گروپه‌ تیرۆرستیه‌كانه‌وه‌، له‌گه‌ڵ ئه‌وه‌شدا تا راده‌یه‌ك ئه‌و گروپه‌ تیرۆرستیانه‌ كاری خۆیان هه‌ر ده‌كه‌ن له‌ كۆكردنه‌وه‌ی یارمه‌تی و ناردنی گه‌نجان بۆ ناو ریزی گروپه‌كانیان، ئه‌وه‌ی جێگه‌ی سه‌رنجه‌ ئێستا هه‌موو ئه‌و كه‌سانه‌ی گومانیان لێده‌كرێت له‌ ژێر چاودێری توندی ده‌زگا ئه‌منیه‌كاندان، به‌پێی راپۆرتی ده‌زگاكانی راگه‌یاندن له‌ فه‌ره‌نساو ئه‌ڵمانیاو به‌لجیكا ئه‌و كه‌سانه‌ی له‌ ئه‌وروپاوه‌ رووله‌ سوریاو عیراق ده‌كه‌ن ژماره‌یان زۆره‌و به‌ هه‌زاران گه‌نج ده‌بن، ته‌نها له‌ فه‌ره‌نسا  پێنج تا حه‌وت هه‌زار جیهادی ئێستا له‌ناو گروپه‌ تیرۆرستیه‌كاندان له‌ عیراق و سوریا، به‌شی زۆریشیان رۆڵی سه‌ركرده‌ی گروپه‌كان ده‌بینن له‌ داعش و قاعیده‌و جه‌بهه‌تلنوسره‌.

 هه‌روه‌ها ئێستا وڵاتانی ئه‌وروپا له‌ فڕۆكه‌خانه‌و سنوره‌كان  كۆنتڕۆڵیان توندكردۆته‌وه‌ بۆ رێگه‌گرتن له‌و دیارده‌یه‌ی كه‌ گه‌نجان به‌ناوی ونبوونه‌وه‌ په‌یوه‌ندی به‌ گروپه‌ تیرۆرستیه‌كانه‌وه‌ ده‌كه‌ن.

PUKmeida لوقمان به‌رزنجی- برۆكسل