پێنجەم كەشتی نەوتی هەرێم باركرا

سبەینێ بەندەری جیهان بەجێدێڵێت

بڕیارە سبەینێ پێنەجمین كەشتی نەوتی هەرێم كە بڕی ملیۆنێك بەرمیل نەوتی هەڵگرتوە بەندەری جیهانی توركیا بەجێبهێڵێت.

ئاژانسی هەواڵی رۆیتەرز لەزاری سەرچاوەیەكی كەرتی وزەی توركیاوە بڵاویكردەوە كەشتیەكی گەورە كە ناوی گالامارییەو ئێوارەی دوێنێ 2014/7/30 گەیشتوەتە بەندەری جیهانی توركیا بۆ باركردنی بڕی ملیۆنێك بەرمیل نەوتی هەرێمی كوردستان كە لە كۆگاكانی ئەو بەندەرەدا بۆ باركردن ئامادەیه‌.

بەوتەی سەرچاوەكە بڕیارە سبەینێ پێنجەجەم كەشتی بارهەڵگری نەوتی هەرێم كە  ناوی گالامارییە بەندەری جیهانی توركیا جێبهێڵێت و بەرەو دەریای ناوەڕاست بڕوات.

رۆیشتنی پێنجەم كەشتی نەوتی هەرێم لەتوركیاوە لەكاتێكدایە كە كەشتییەكی تر كە نەوتی هەرێمی باركردوە بەرەو ویلایەتی تەكساسی ئەمریكا، بەڵام لەلایەن حكومەتی عیراقەوە لەدادگای ئەو ویلایەتە سكاڵا لەسەر حكومەتی هەرێم تۆماركراو لەلایەن ئەمریكاوە دەستبەسەر كەشتیە نەوتەكەدا گیرا.

دواتریش ئاشتی هەورامی وەزیری سامانە سروشتیەكانی حكومەتی هەرێم رایگەیاند: پارێزەرەكانی حكومەتی هەرێمی كوردستان نامەیەكیان ناردووە بۆ دادگاكە لە تەكساس بۆ روونكردنەوەی چەواشەكارییەكانی حكومەتی فیدراڵی عیراق. حكومەتی فیدراڵی عیراق سكاڵایەكی بۆ دادگایەكی تەكساس بەرزكردووەتەوە بۆ دەركردنی فەرمانێك بۆ دەستبەسەراگرتنی ئەو نەوتە خاوەی كە بەشێوەیەكی یاسایی بەرهەمهێنراوە و هەناردەكراوە و فرۆشراوە لەلایەن حكومەتی هەرێمی كوردستانەوە بەپێی دەستوور و یاساكانی عیراق، نامەكە ئاماژە دەدات بە ئەگەری تۆماركردنی چەندین داوای یاسایی دژی حكومەتی فیدراڵی.

وتیشی: حكومەتی فیدراڵی عیراق لە دادگاكانی دەرەوەو دادگای باڵای عیراقدا هەوڵ دەدات ئەوە بەدەست بهێنێت كە لەلایەن دەستووری عیراقیەوە نكوڵی لێكراوە بۆ حكومەتی فیدراڵی.

حكومەتی فیدراڵی ناتوانێت بیباتەوە، چونكە نەوتی خاومان بەشێوەیەكی یاسایی بەرهەمهێنراوە و باركراوە و هەناردەكراوە و فرۆشراوە بە پێی مافەكانی هەرێمی كوردستان هەروەك لە دەستووری عیراقیدا هاتووە.

وەزیری سامانە سروشتیەكانی هەرێم ئەوەشی خستوەتەڕوو: داواكانمان بۆ قەرەبووە نەدراوەكان كە پێویستە بدرێن، بەپێی دەستوور و یاساكانی عیراق، ئامادەدەبن لەبەردەم هەر دادگایەكی دەرەكیدا كە لەوێ حكومەتی فیدراڵی دەیەوێت هێرشمان بكاتە سەر.

PUKmedia