لەبارەی مافی چارەنوس و پرسی سەربەخۆییەوە

.

ئەمڕۆ هەلومەرج و قۆناغێكی نوێ لەسەر ئاستی عیراق و خۆرهەڵاتی ناوەڕاست و دونیا، بۆ نەتەوەی كورد و گەلی كوردستان هاتۆتە ئاراوە. ئەم قۆناغە نوێیە، وادەخوازێت، گەلی كوردستان خۆی بڕیار لە مافی چارەنووسی خۆی بدات و ئێستا و ئایندەی دیاری بكات، هەر بۆیە پێویستە سەركردایەتی سیاسی كورد یەكهەڵوێست و خاوەن یەك گوتاری سیاسی و ستراتیجی و یەكگرتوو بن و هەل و دەرفەتی زێڕین لەدەست نەدەن، مێژووش رەحم بەكەس ناكات.

(سەربەخۆیی كوردستان)یش مافێكی رەوا و یاسایی و سروشتییە چ بەپێی یاسا ئاسمانی و نێودەوڵەتییەكان، چ بەپێی ئەو فەلسە و شەریعانەی ئەمڕۆ لە دونیادا حوكمڕانیان پێ دەكرێت. هەر كەس و لایەن و دەوڵەتێك دژی مافی نەتەوەكان بوەستێتەوە، شتێكی ئاشكرا و بەڵگەنەویستە كە پێچەوانەی بیروباوەڕ و فەلسەفەی حوكمڕانی خۆی و دەسەڵاتەكەشی كاردەكات.

كام دەوڵەت هەیە باسی مافەكانی مرۆڤ، ئازادیی بیروڕا، پشتیوانیكردنی نەتەوە و گەلانی چەوساوە و ژێردەست نەكات؟ بەڵام كە دێتە سەر مافی چارەی خۆنووسینی نەتەوەی كورد و سەربەخۆیی كوردستان، نەك كوێر و كەڕ دەبن، بەڵكو دژی ئەم مافە رەوا و یاسایی و دروست و سروشتییەی ئەم نەتەوەیە بەبیانووی جیاجیا دەوەستنەوە.

بەئاشكرا و بەبێ دوودڵی و سڵەمینەوە رایدەگەیەنین: مافی چارەنووس و سەربەخۆیی نەتەوە و گەلی كوردستان، تەنیا (گەل) كە سەرچاوەی دەسەڵاتە، بڕیاری لێ دەدات. ئەو كاتەش، لەپێناو جێبەجێكردن و سەرخستنی ئەو بڕیارە پیرۆزە و بەئەنجامگەیاندنیدا، هەموو نرخێك ئەدەین و پابەند ئەبین بە بڕیار و ویستی گەلەوە.

حاكم قادر حەمەجان
ئەندامی دەستەی كارگێڕی مەكتەبی سیاسیی ی.ن.ك