حه‌وت كه‌س له‌ زیندانێكی دهۆك گیانیان له‌ده‌ستدا

.

پارێزگاری دهۆك له‌ باره‌ی رووداوی زیندانی زركا روونكردنه‌وه‌ ده‌دات و ئاماژه‌ بۆ ئه‌وه‌ده‌كات، ئه‌و كه‌سانه‌ی گیانیان له‌ده‌ستداوه‌ به‌هۆی دوكه‌ڵ و ته‌نگه‌نه‌فه‌سییه‌وه‌ بووه‌.

له‌ كۆنگره‌یه‌كی رۆژنامه‌وانیدا فه‌رهاد ئه‌تروشی پارێزگاری دهۆك هۆكاری رووداوه‌كه‌ی زیندانی زركای دهۆك و ژماره‌ی قوربانییه‌كانی راگه‌یاندو وتی: له‌ئێستادا شه‌ڕو ئاڵۆزییه‌كانی ناو زیندانه‌كه‌ به‌ ته‌واوی كۆنترۆڵكراوه‌و هیچ كێشه‌یه‌ك نه‌ماوه‌.

وتیشی: له‌و رووداوه‌دا حه‌وت كه‌س گیانیان له‌ده‌ستداوه‌و نزیكه‌ی 10 بۆ 12 كه‌سیش برینداربوون، هه‌روه‌ها رووداوه‌كه‌ له‌ به‌شی زیندانیانی تیرۆر بووه‌و زیندانیه‌كانی دیكه‌ی به‌شه‌كان سه‌لامه‌ت.

ئه‌تروشی راشیگه‌یاند: سه‌ره‌تای رووداوه‌كه‌ له‌وه‌وه‌ ده‌ستیپێكردوه‌ كه‌ زیندانییه‌كی به‌ ره‌گه‌ز عه‌ره‌ب ئاگری له‌ راڕه‌وی زیندانییه‌كه‌ به‌رداوه‌و به‌وهۆیه‌شه‌وه‌ ئاڵۆزی له‌ناو زینداییه‌كه‌دا روویداوه‌و سه‌رجه‌م ئه‌وانه‌شی كه‌ گیانیانله‌ده‌ستداوه‌ به‌هۆی كاریگه‌ری دوكه‌ڵ و ته‌نگه‌نه‌فه‌سییه‌وه‌ بووه‌.

ئه‌وه‌شی خسته‌ڕوو: به‌هیچ شێوه‌یه‌ك ته‌قه‌كردن و لێدان له‌ لایه‌ن پاسه‌وانانی زیندانییه‌كه‌وه‌ له‌ زیندانییه‌كان نه‌كراوه‌و سه‌رجه‌م قوربانییه‌كان به‌هۆی ئاگره‌كه‌وه‌ گیانیان له‌ ده‌ستداوه‌ یان برینداربوون.

پارێزگاری دهۆك ئاماژه‌ی بۆ ئه‌وه‌شكرد: له‌ئێستادا بارودۆخه‌كه‌ كۆنترۆڵكراوه‌و لیژنه‌ی تایبه‌تمه‌ندی لێكۆڵینه‌وه‌ له‌ رووداوه‌كه‌ پێكهێنراوه‌ بۆ به‌دواداچوونی زیاتر له‌ سه‌ر رووداوه‌كه‌.

PUKmedia تایبه‌ت