نه‌ته‌وه‌ یه‌كگرتووه‌كان: به‌پێی پێویست هه‌ژماری ده‌نگه‌كان بكرێته‌وه‌

.

نوێنه‌ری تایبه‌تی سكرتێری گشتیی نه‌ته‌وه‌ یه‌كگرتووه‌كان له‌ عیراق داوا له‌ كۆمیسیۆن ده‌كات ده‌ست به‌ لێكۆڵینه‌وه‌ی پرۆسه‌ی هه‌ڵبژاردن بكات.

یان كوبیش، نوێنه‌ری تایبه‌تی سكرتێری گشتیی نه‌ته‌وه‌ یه‌كگرتووه‌كان له‌ عیراق داوا له‌ كۆمیسیۆنی باڵای سه‌ربه‌خۆی هه‌ڵبژاردنه‌كان ده‌كات بۆ به‌زوویی ده‌ستكردن به‌ لێكۆڵێنه‌وه‌ ‌له‌ هه‌موو سكاڵایه‌كانی په‌یوه‌ست به‌ پرۆسه‌ی هه‌ڵبژاردنه‌وه‌.

كوبیش له‌مباره‌وه‌ وتیشی: "كۆمیسیۆن پێویسته‌ به‌زوویی بكه‌وێته‌ كار بۆ لێكۆڵینه‌وه‌ی ده‌ربه‌ستانه‌ له‌هه‌موو سكاڵاكان به‌ گرتنه‌خۆی، به‌ گوێره‌ی پێویست، ده‌ستكردن به‌ هه‌ژماركردنی هه‌نده‌كییانه‌ (جوزئی) ی به‌ده‌ستی له‌ بنكه‌ ده‌ستنیشانكراوه‌كاندا به‌تایبه‌تیش له‌كه‌ركوك، هه‌روه‌ها ئه‌وه‌ش گرنگه‌ كه‌ بۆ پته‌وكردنی متمانه‌ به‌ پرۆسه‌كه‌ هه‌ژماركردنه‌وه‌كه‌ به‌ئاماده‌بوونی ته‌واوی لایه‌نه‌ په‌یوه‌ندیداره‌كان و به‌ شێوه‌یه‌كی روون ئه‌نجام بدرێت. بۆ ئه‌م مه‌به‌سته‌ش، نه‌ته‌وه‌ یه‌كگرتووه‌كان ئاماده‌یی هه‌موو هاوكارییه‌كه‌ گه‌ر پێویست بێت." 

  كوبیش ئه‌وه‌شی خسته‌ڕوو:"من داوا له‌ هه‌موو لایه‌نه‌ سیاسییه‌كانیش ده‌كه‌م بۆ پاراستنی ئاشتی و پابه‌ندبوون به‌ چاره‌سه‌كردنی هه‌ر كێشه‌یه‌كی په‌یوه‌ست به‌ هه‌ڵبژاردنه‌وه‌ له‌رێگه‌ی شێوازه‌ یاساییه‌ به‌ركاره‌كانه‌وه‌".

ئه‌مه‌ش له‌كاتێكدایه‌، سه‌عدی ئه‌حمه‌د پیره‌ وته‌بێژی ره‌سمی یه‌كێتیی نیشتمانیی كوردستان رایگه‌یاندوه‌، یه‌كێتی بێمنه‌ته‌ له‌سه‌رتاسه‌ری عیراق و ئه‌و جێگایانه‌ی كه‌ گله‌یی له‌شێوه‌ی هه‌ژماركردنی ده‌نگه‌كان هه‌یه‌، ده‌نگه‌كان جارێكی دیكه‌ هه‌ژماربكرێنه‌وه‌.

PUKmedia تایبه‌ت