riklam

چه‌ند ڕاستیه‌ك بێ توڕه‌بون ....

بیروڕا 07:37 PM - 2018-05-13
.

.

عه‌بدولواحید دوكانی

هاوڕێم ..هیوادارم كه‌مێك دور له‌عاتیفه‌ و به‌ عه‌قڵ و مه‌نتقه‌وه‌ له‌گه‌ڵم بیت له‌م چه‌ند خاڵه‌دا وه‌ به‌ دڵێكی ساف و هاوڕێیانه‌ دور له‌ هه‌ڵچوون بیڕبكه‌ره‌وه‌و بڕیاربده‌ .
تكایه‌ له‌م حه‌مله‌ دورو درێژه‌ نه‌مهێشتوه‌ كه‌س دڵی لێم بهێشێت و شعوری كه‌سم بریندار نه‌كردوه‌و هیوادارم تۆش به‌ كۆمێنتێك یان قسه‌یه‌كی بێڕێزی بریندارم نه‌كه‌یت بۆئه‌وه‌ی ناچار نه‌بم كۆتایی به‌ هاوڕێیه‌تیمان بهێنم ، كه‌ ڕێز گرتن له‌ پێش هه‌موو شتێكه‌وه‌یه‌ و من ده‌تانخه‌مه‌ سه‌رچاوم .

1 .پرۆسه‌كه‌ له‌ ته‌واوی عیراق به‌ به‌شداریه‌كی كه‌می خه‌ڵك تیایدا به‌ڕێوه‌چوه‌و ته‌نها كوردستان نیه‌و ئه‌وه‌ش زۆر له‌ نه‌تیجه‌كانی به‌زیانی حزبه‌ ئۆپۆزسیۆنه‌كان گۆڕیوه‌ كه‌ خه‌ڵكی ناڕازی و یان بێلایه‌ن متمانه‌ی به‌ ئۆپۆزسیۆن و هوتاف و دروشم كه‌م بوه‌و تاقه‌تی نه‌ماوه‌ ده‌نگیش بدات ، به‌وه‌ش ڕێژه‌ی حزبه‌كانی تری هه‌ڵكشاندوه‌ .

2. ده‌نگی یه‌كێتی كه‌به‌رز بۆته‌وه‌ ئه‌مجاره‌ چه‌ند هۆكارگه‌لێكی جیاوازی هه‌یه‌ له‌وانه‌ ( وه‌لانانی كێشه‌ناوخۆییه‌كانی سه‌ركردایه‌تی و گه‌ڕانه‌وه‌ی ئومێد بۆ خه‌ڵكی یه‌كێتێ ، وه‌فای خه‌ڵك بۆ ماندوبونه‌كانی سه‌رۆك مام جه‌لال ، ته‌واوبونی شه‌ڕی داعش و ڕوبارێ خوێنی فه‌رمانده‌و پێشمه‌رگه‌كانی یه‌كێتی بۆ به‌رگری خاكی كوردستان ، بینینی جه‌ماوه‌ری یه‌كێتی كه‌ هه‌موان ده‌یانه‌وێت زوڵم له‌ یه‌كێتی بكه‌ن ، دڵسۆزی تیمی هه‌ڵبژاردنه‌كان و هه‌ڵمه‌تی ده‌رگا به‌ده‌رگاو ده‌ست به‌ده‌ستی هه‌ڤاڵان ، ده‌رنه‌كه‌وتنی كۆمه‌ڵێ خه‌ڵكی پله‌باڵا كه‌ خه‌ڵك خۆشی نه‌ویستون و چه‌ند هۆكارێكی تریش ) .

3. خه‌ڵكی تێگه‌یشت به‌لاوازبونی یه‌كێتی ته‌رازوی هێز ده‌گۆڕێت له‌به‌رژه‌وه‌ندی لایه‌نێكی تر و به‌وه‌ش سه‌رجه‌م ئازادی و سه‌ربه‌ستیه‌كان له‌قاڵب ده‌درێن و ناتوانرێت پشت به‌هێزی تر ببه‌سترێت كه‌ ئه‌و هاوكێشه‌یه‌ هاوسه‌نگ بكاته‌وه‌ .

4. دروستبونی هه‌ریه‌ك له‌ ( نه‌وه‌ی نوێ و هاوپه‌یمانی ) ژماره‌یه‌كی یه‌كجارزۆری ده‌نگی گۆڕان و یه‌كگرتوو وه‌لایه‌نه‌كانی تریشی هه‌ڵلوشیه‌وه‌ كه‌ به‌وه‌ش ده‌نگه‌كانی كه‌ جاران هه‌ر نه‌ده‌دران به‌یه‌كێتی و ده‌دران به‌ گۆڕان و یه‌كگرتوو ئێستا له‌ناو ئه‌و هێزانه‌ دابه‌ش بوه‌و به‌وه‌ش ده‌نگی یه‌كێتی به‌رز كردۆته‌وه‌ .

5. سیستمی سانتلیگۆی هه‌مواركراو خۆی له‌هه‌موو دنیا زه‌ربه‌ی كه‌مه‌رشكێن له‌ ده‌نگی كه‌م ده‌دات وه‌ ئه‌و سیستمه‌ش له‌ عێراق په‌یڕه‌و ده‌كرێ .

6. خه‌ڵكی بێلایه‌ن و خۆڵه‌مێشی كه‌ تا دواسات بڕیارنادات ده‌نگ بدات به‌كێ ، بۆئه‌م قۆناغه‌ پێی وایه‌ یه‌كێتی له‌رووی ئابوریه‌وه‌ ده‌توانێت په‌یوه‌ندیه‌كانی هه‌رێم له‌گه‌ڵ به‌غدا باشتر بنیات بنێته‌وه‌و ئاهێك به‌ بازاڕدا بێته‌وه‌ ، چه‌ندین نمونه‌ی له‌م جۆره‌ لای شه‌خسی خۆم هه‌یه‌ .

7. ببورن هاوڕێیانی گۆڕان به‌ڵام ڕاستیه‌كی تاڵه‌ ، خه‌ڵك بروای كه‌می به‌و سه‌ركرده‌و نوێنه‌رانه‌تان ماوه‌ كه‌ نزیكی پاره‌و پۆست ده‌بنه‌وه‌ ، خه‌ڵك بینی چه‌ندین وه‌زیرو په‌رله‌مانتارو سه‌ركرده‌ی گۆڕان به‌سانایی چونه‌ باوه‌شی پارتیه‌وه‌و ئه‌وه‌ش كاریگه‌ری زۆڕی هه‌یه‌ له‌سه‌ر متمانه‌ی خه‌ڵك .

8. به‌رله‌وه‌ی ئێوه‌ باسی رووداوه‌كانی كه‌ركوك بكه‌ن و بڵێن خاكفرۆشراوو 16ی ئۆكتۆبه‌رو ووووو ، ده‌مه‌وێت ئه‌وه‌تان پێبڵێم كه‌ بۆ خه‌ڵك روون بوه‌وه‌ كه‌ كه‌ركوك یه‌كێتی نه‌یفرۆشتوه‌ به‌ڵكو به‌ كشانه‌وه‌ی پاراستی له‌ وێران بون و كاولكاری و سوربونی شه‌قامه‌كانی به‌خوێن و هه‌روه‌ها پاراستی له‌ پلانگێڕی ئیقلیمی بۆ داگیركاری له‌لایه‌ن توركیاوه‌ ، ئه‌وه‌ روون بۆته‌وه‌ .

9. ڕێژه‌ی كه‌می ده‌نگده‌ر هاوكێشه‌كه‌ی گۆڕی ، چونكه‌ به‌دڵنییایه‌وه‌ یه‌كێتیه‌كان ئه‌مجاره‌ هه‌موی چون بۆ ده‌نگدان و كۆبونه‌وه‌ جه‌ماوه‌ریه‌كانی كاك قوباد و كاك لاهور گه‌واهی ئه‌و ڕاستیه‌ن كه‌ له‌ هه‌مووناوچه‌كان ئه‌نجام دراو حه‌شاماتی سه‌وزتان بینیوه‌ به‌چاوی خۆتان ، له‌به‌رامبه‌ردا ده‌نگێك كه‌نه‌چوه‌ بۆبه‌شداری ده‌نگی لایه‌نه‌كاخی تربوه‌ كه‌ توڕه‌ن له‌ ئه‌دای سیاسه‌تیان و ته‌عامولیان و تێگه‌یشتون كه‌ چۆن نه‌یانتوانی هیچ بگۆڕن و واقیع سه‌ره‌وژور بكه‌ن بۆله‌مه‌ودواش ناتوانن .

10 . ئه‌گه‌ر پێتان وابێت وه‌ك هه‌ندێ له‌براده‌ران ده‌ڵێن ( ئێران سیستمه‌كه‌ی هاك كردوه‌ ) كه‌ ئه‌وه‌ مه‌حاڵه‌ چونكه‌ سیستمه‌كه‌ مه‌ركه‌زیه‌و سێرڤه‌ره‌كه‌شی له‌ده‌ره‌وه‌ی عێراق بوه‌و كۆنترۆڵكردنه‌كه‌ی له‌ ده‌ره‌وه‌ی ئیراده‌ی ئێران بوه‌ چونكه‌ ئه‌گه‌روابێ ئه‌مریكا چ كاره‌یه‌ ؟؟ ئینجا ئه‌گه‌ر ئێران ئه‌وه‌ی بكردایه‌ بۆ نوری مالكی و هادی عامری ده‌كرد كه‌ له‌ ریزبه‌ندی سێیه‌م و چواره‌می عێراقن و نه‌یده‌هێشت عه‌بادی و موقته‌داسه‌در پێشیان بكه‌ونه‌وه‌ .
زۆر هۆكارگه‌لی تر هه‌ن به‌ڵام هیوادارم ئه‌م چه‌ند خاڵه‌ به‌وردی تێیڕامێنن و به‌سنگ فراوانیه‌وه‌ دان به‌ سه‌ركه‌وتنی یه‌كێتیدابنێن و ئێمه‌ش هه‌مان ئه‌و تاڵیه‌ی ئێوه‌مان چه‌شتوه‌و هه‌ست به‌ئازارو ناڕه‌حه‌تیتان ده‌كه‌ین ، پشودرێژی له‌ سیاسه‌ت كردندا زۆر گرنگه‌ ، هیوادارم به‌هه‌موومان بتوانین مافه‌كانی ئه‌م گه‌له‌ به‌ده‌ست بهێنین و بیگه‌یه‌نینه‌ كه‌ناری ئارامی .

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket