قوباد تاڵەبانی: ھەندێک لایەن لەبەغدا تەنھا کار بۆ ناوبانگی خۆیان دەکەن

.

بەسەركردنەوەكانی ھەڵمەتەكانی بانگەشەی ھەڵبژاردن بۆ لیستی ١٦٢ی یەكێتیی نیشتمانیی كوردستان بۆ ھەڵبژاردنی پەرلەمانی عێراق بەردەوامە.

ئەمڕۆ ٢ی ئایار، قوباد تاڵەبانی سەردانی باڵەكایەتی كرد و لە بەسەركردنەوەی سەرەتاشدا سەردانی ناحیەی قەسرێی كرد و لە لایەن ژمارەیەكی زۆری لایەنگرو كادرو ئەندامانی یەكێتی لە ناحیەكە پێشوازی لێكراو دواتر لە وتەیەكدا لە بەردەم یەكێتییەكانی قەسرێدا وتی: سوپاس كە لێرە لەگەڵتانم، ئێمە دە  رۆژمان ماوە بۆ ھەڵبژاردن بۆیە ھەمووتان بە یەكەوە كار بكەن بۆ سەرخستنی لیستەكەتان.

ئەوەشی خستەڕوو: پرسیارێكتان لێدەكەم، ئایا چۆن چوار ساڵێكتان دەوێت؟ دەتانەوێت وەك چوار ساڵی رابردوو برۆینە بەغداد، یان وەك ئەو كاتە بڕۆینەوە بەغداد كە ھەڤاڵ مام جەلال و یەكێتی لە بەغداد ھاوسەنگی كوردستانیان راگرتبوو؟ بۆیە ئەگەر دەتانەوێت چوار ساڵی داھاتوومان، چوار ساڵی ئایندەمان بێت دەنگ بدەن بە لیستی ١٦٢ی یەكێتی و لیستی مام جەلال.

قوباد تاڵەبانی ئاماژەی بەوەشكرد: یەكێتی تەنھا ھی یەكێتییەكان نییە، ئێمە وەك ھەندێك لایەن نین كە تەنھا كار بۆ خۆمان و ناوبانگی خۆمان بكەین. بەڵكو ئێمە كار بۆ تەواوی كۆمەڵانی خەڵكی كوردستان دەكەین. 

ئەوەشی وت: بێ ویژدانییەكی زۆر لەلایەن ھەندێك لایەنەوە دژ  بەیەكێتی دەكرێت، بۆیە دەبێت لە رۆژی دەنگدان دەبێت ھەمووتان بەیەكەوە، بە دەنگەكانتان وەڵامی ئەو بێ ویژدانییە بدەنەوە.  

PUKmedia