لاهور شێخ جه‌نگی: یه‌كێتی ده‌ستبه‌رداری هه‌ڵویسته‌ نه‌ته‌وایه‌تییه‌كان نابێت

.

لاهور شێخ جه‌نگی ده‌ڵێت: له‌ناوخۆ و ده‌ره‌وه‌ هه‌وڵی بچووكردنه‌وه‌ی یه‌كێتی ده‌ده‌ن و دوای هه‌ڵبژاردنه‌كان گۆڕانكاری حزبی و حكومی ده‌كه‌ین.

به‌یانی ئه‌مڕۆ چوارشه‌ممه‌ 2-5-2018 لاهوری شێخ جه‌نگی به‌شداری له‌ كه‌رنه‌ڤاڵی ناساندنی كاندیدانی لیستی 162 ی یه‌كێتیی نیشتمانیی كوردستان له‌ ته‌قته‌ق كرد و و تارێكی پێشكه‌شكرد و ڕایگه‌یاند: نه‌یاره‌كانمان له‌ ناوخۆ و ده‌ره‌وه‌ هه‌وڵی بچووكردنه‌وه‌ی یه‌كێتی ده‌ده‌ن و ئێوه‌ ده‌بێت یه‌كێتی سه‌ربه‌رز بكه‌نه‌وه‌ و به‌ گوڕ و تینه‌وه‌ به‌شداری هه‌ڵبژاردن بكه‌ن چونكه‌ ئه‌م هه‌ڵبژاردنه‌بۆ میلله‌ته‌كه‌مان چاره‌نووسسازه‌.

وتیشی: یه‌كێتی پێشه‌نگی قوربانیدانه‌ و هه‌رگیز یه‌كێتی ده‌ستبه‌رداری هه‌ڵوێسته‌ نه‌ته‌وایه‌تییه‌كانی خۆی نابێت و ته‌نها یه‌كێتی و نوێنه‌ره‌كانی یه‌كێتی ده‌توانن به‌رگری له‌ مافه‌كانی كورد بكه‌ن له‌ به‌غدا، چونكه‌ ئه‌م هه‌ڵبژاردنه‌ بۆ جێبه‌جێكردنی ده‌ستووره‌.

لاهوری شێخ جه‌نگی ئاماژه‌ی به‌وه‌ كرد كه‌ داهاتووی میلله‌ته‌كه‌مان به‌م هه‌ڵبژاردنه‌وه‌ به‌ستراوه‌ته‌وه‌ و ئێمه‌ به‌بێ سه‌رۆك مام جه‌لال هه‌ڵبژاردن به‌ڕێ ده‌كه‌ین و داوا ده‌كه‌م به‌ گوڕ و تینه‌وه‌ به‌شداری هه‌ڵبژاردن بكه‌ن.

لاهوری شێخ جه‌نگی وتیشی: دوای هه‌ڵبژاردن گۆڕانكاری حزبی و حكومی ده‌كه‌ین و یه‌كێتی نوێ ده‌كه‌ینه‌وه‌.

دواتر هه‌رێمی كه‌مال ئاغا سه‌رۆكی لیستی 162 ی یه‌كێتیی نیشتمانیی كوردستان بۆ پارێزگای هه‌ولێر وته‌یه‌كی پێشكه‌ش كرد و ڕایگه‌یاند كه‌ پێویسته‌ یه‌كێتی به‌ تیمێكی به‌هێز له‌ به‌غدا بیت و به‌ ڕوئیای سه‌رۆك مام جه‌لال كار ده‌كات و یه‌كێتی سه‌رچاوه‌ی هێز بووه‌ بۆ باكوور و ڕۆژهه‌ڵات و ڕۆژئاوای كوردستان.

پاشان ئارێز عه‌بدڵڵا ئه‌ندامی سه‌ركردایه‌تی یه‌كێتی و كاندیدی لیستی 162 ڕایگه‌یاند: درێژكردنه‌وه‌ی ماوه‌ی سه‌رۆكایه‌تی هه‌رێم كاره‌سات بوو و هه‌ڵه‌مان كرد كه‌ له‌ سی حوزه‌یراندا ماوه‌ی سه‌رۆكایه‌تی مه‌سعود بارزانیمان درێژكرده‌وه‌ كه‌ ئه‌مه‌ كاره‌ساتی گه‌وره‌ی دروستكرد و كار گه‌یشته‌ ئه‌وه‌ی كه‌ مه‌سعود بارزانی بڵێت حساب بۆ هیچ كه‌سێك ناكه‌م.

PUKmedia تایبه‌ت