ئه‌نجومه‌نی باڵای خانمان: به‌رگریكاری ژنه‌ كاندیده‌كانین

.

ئه‌نجومه‌نی باڵای كاروباری خانمان هۆشداری ده‌دات له‌ هه‌ر سوكایه‌تی پێكردن و ته‌شهیر و تۆمه‌تباركردنێكی ژنه‌ كاندیدكراوه‌كان له‌ رووی كۆمه‌ڵایه‌تییه‌وه‌.

ده‌قی به‌یاننامه‌كه‌..
 گه‌لی كوردستان و ته‌واوی گه‌لانی عیراق له‌ به‌رده‌م تاقیكردنه‌وه‌یه‌كی دیموكراتی نوێدان كه‌ خۆی له‌ هه‌ڵبژاردنه‌كانی خولی نوێی ئه‌نجومه‌نی نوێنه‌رانی عیراق ده‌بینێته‌وه‌، ژنانیش رێژه‌یه‌كی به‌رچاو له‌ به‌شداریكردن و له‌ كاندیده‌كان پێكده‌هێنن، رۆژی یه‌كشه‌ممه‌ 15/4/2018 هه‌ڵمه‌تی بانگه‌شه‌ی قه‌واره‌ سیاسییه‌ به‌شداربووه‌كان و كاندیده‌كان له‌ هه‌رێمی كوردستان ده‌ستپێده‌كات.
جێگه‌ی داخه‌ كاندید و پاڵێوراوه‌ ئافره‌ته‌كان زۆرجار ده‌بنه‌ ئامانجی توانجی نابه‌جێ و ته‌نانه‌ت له‌ هه‌ندێ حاڵه‌تیشدا له‌ ڕووی كۆمه‌ڵایه‌تییه‌وه‌، ڕووبه‌ڕووی ته‌شهیر و سوكایه‌تی پێكردن و تۆمه‌تی ناڕه‌واده‌بنه‌وه‌.
له‌ سۆنگه‌ی هه‌ستكردنمان به‌ به‌رپرسیاریه‌تی، ئێمه‌ وه‌ك ئه‌نجومه‌نی باڵای كاروباری خانمان له‌ حكومه‌تی هه‌رێمی كوردستان، هۆشداری ده‌ده‌ین له‌ هه‌ر سوكایه‌تی پێكردن و ته‌شهیر و تۆمه‌تباركردنێكی ژنه‌ كاندیدكراوه‌كان له‌ رووی كۆمه‌ڵایه‌تییه‌وه‌.
ئاماده‌ین وه‌ك به‌رگریی كاربین و سكاڵا له‌سه‌ر هه‌ر كه‌س و لایه‌نێك تۆماربكه‌ین كه‌ ته‌شهیر و سوكایه‌تی له‌ رووی كۆمه‌ڵایه‌تی و ره‌وشتییه‌وه‌ به‌ ژنان بكات.

ئه‌نجومه‌نی باڵای كاروباری خانمان
 له‌ حكومه‌تی هه‌رێمی كوردستان

PUKmedia