riklam

بۆچی هه‌رگیز نیشتمان نابێته‌ هی هه‌مووان؟

بیروڕا 01:49 PM - 2018-04-04
.

.

نیشتمان ئه‌و پارچه‌ زه‌ویه‌یه‌ كه‌ كۆمه‌ڵه‌ كه‌سانێك له‌سه‌ری نیشته‌جێن و ده‌بێته‌ زێدی خۆیان و نه‌وه‌ و باوباپیرانیشیان، هه‌ر ئه‌مه‌شه‌ كه‌ ده‌بێته‌ هۆكاری خۆشویستنی و خۆبه‌ختكردن له‌ پێناویدا،و ڕێگه‌نه‌دان به‌هیچ داگیركه‌رێكی ده‌ره‌كی كه‌ پێی بخاته‌ سه‌ر و خێروبێری وڵاته‌كه‌ به‌هه‌ده‌ر بباتو كوشت و كوشتاری تیادا بكات.

نیشتمان چه‌نده‌ بچوك یان گه‌وره‌ بێت ،یا ده‌وڵه‌مه‌ند و هه‌ژار بێت یاخود چه‌نده‌ ناخۆش بێت له‌ڕووی كه‌شوهه‌واو و ژینگه‌ و نه‌بونی سیسته‌مێكی حوكمڕانی دادپه‌روه‌ر كه‌ ئازادیه‌كانی تاك و كۆمه‌ڵگای تیادا زه‌وتكرابێت و دیموكراسیه‌ت و مافی مرۆڤی تیادا پێشیل بكرێت،هه‌ر خۆشه‌ویسته‌ و هیچ كات مرۆڤه‌كان ناتوانن ده‌ستبه‌رداری ببن، نیشتمان لانكه‌ و نه‌وای هاونیشتیمانیانی خۆیه‌تی،هه‌رچه‌نده‌ ئه‌و تاكانه‌ش نادڵسۆز و بێوه‌فاو بێ ئه‌مه‌ك و خه‌مخۆریش نه‌بن بۆی.
نیشتمان ئه‌و دایكه‌ به‌سۆزه‌یه‌ كه‌ هه‌موان به‌ باش و خراپه‌وه‌ له‌ ئامێز ده‌گرێت به‌بێ جیاوازی،به‌ڵام ئه‌وه‌ مرۆڤه‌كانه‌ خۆیان لێده‌گۆڕێت و ده‌بنه‌ كه‌سانی سپڵه‌ و بێ ئه‌مه‌ك بۆ نیشتمانه‌كه‌یان.

مرۆڤه‌كان یاخود هه‌ندێكی كه‌م له‌ مرۆڤه‌كان به‌ڕێكه‌وت یان به‌ تۆپزی خۆیان ده‌كه‌نه‌ ده‌مڕاست و لێپرسراو و سه‌ركرده‌ی نیشتمان و هاله‌ و خه‌رمانه‌یه‌كی درۆینه‌ به‌ده‌وری خۆیاندا دروست ده‌كه‌ن یان كه‌سانی ده‌وروبه‌ریان له‌ هه‌لپه‌رست و گه‌نده‌ڵ و مشه‌خۆره‌كان بۆیان دروستده‌كه‌ن و له‌بارچاوی خۆیانیشدا خۆیان لێ گه‌وره‌ ده‌كه‌ن و  له‌ زۆرینه‌ی جه‌ماوه‌ر دایانده‌بڕن و ده‌یانگه‌یه‌نن كه‌شكه‌لانی ئاسمان و به‌رزیان ده‌كه‌نه‌وه‌ و ده‌یانخه‌نه‌ ((ێه‌ومه‌عه‌یه‌كی))داخراوی له‌ خوا و له‌جه‌ماوه‌ریش دوور ،ئیدی لێره‌وه‌ مه‌ینه‌تیه‌كانی نیشتمان ده‌ستپێده‌كات و چه‌ندین چینی جیاواز دروست ده‌بێت و ململانێ چینایه‌تیه‌كان سه‌رهه‌ڵده‌ده‌ن و كۆمه‌ڵگاش شه‌قار شه‌قار ده‌بێت، چینێكی ده‌سه‌ڵاتدار و خۆ به‌زلزان و مه‌غرور و بێ منه‌ت له‌گه‌ل و نیشتمان له‌سایه‌ی ده‌سه‌ڵات و پۆست و پله‌ و ئیمتیازاته‌كانه‌وه‌ كه‌ دوور له‌ مافی ڕه‌وای خۆیان به‌ده‌ستیان هێناوه‌ ،چینێكیش هه‌میشه‌ سووته‌مه‌نی خه‌بات و خۆپیشاندان و شۆڕش و ڕاپه‌ڕینه‌كان بوه‌له‌لایه‌ك دژ به‌ داگیركه‌رانی ده‌ره‌كی و دواتریش له‌سه‌رده‌می حوكمڕانی  خۆیه‌تیدا ده‌بنه‌ سووتماك بۆ هه‌وه‌س و ئاره‌زووه‌كانی شۆڕشگێڕانی دوێنێی نیشتمان و  و خۆسه‌پێن و تاكڕه‌وی ده‌سه‌ڵاتی ئه‌مڕۆ،ئیدی ئه‌م دوو چینه‌ دژ به‌یه‌كه‌ نیشتمان دابه‌ش ده‌كه‌ن له‌نێو خۆیاندا،چینه‌ كه‌مینه‌ ده‌سه‌ڵاتداره‌كه‌ به‌ناوی ((شه‌رعیه‌تی شۆڕشگێڕیه‌وه‌))هه‌موو حه‌رام و تابۆكانی نیشتمان بۆ خۆیان حه‌ڵاڵ ده‌كه‌ن و له‌زۆرینه‌ی جه‌ماوه‌ری به‌ش مه‌ینه‌تی حه‌رام ده‌كه‌ن، ئیدی لێره‌وه‌ نیشتمان نابێته‌ هی هه‌موان وه‌ك یه‌ك وبه‌یه‌كسانی،چونكه‌ هه‌موان له‌سایه‌ی ئاسمان و له‌سه‌ر زه‌مینی نیشتماندا هه‌ست به‌یه‌كسانی و دادپه‌روه‌ری ناكه‌ن و ئازادی و مافه‌كانیان لێزه‌وتكراوه‌ و ته‌نها له‌كاتی ته‌نگانه‌ و شه‌ڕ و جه‌نگه‌ ناڕه‌واكاندا نیشتمان ده‌بێته‌ هی زۆرینه‌ی بێده‌سه‌ڵات كه‌ هه‌میشه‌ سووته‌مه‌نیه‌كی هه‌رزانكراون بۆ قوربانیدان و خۆشكردنی گڕی جه‌هه‌نه‌مێكی ب ناڕه‌وا داگیرساو كه‌ ته‌ڕو وشكی نیشتمان پێكه‌وه‌ ده‌سوتنێنێت.

ئاخر به‌چی نیشمان ببێته‌ هی هه‌موان؟ له‌كاتێكدا ئیمتیازات و خۆشیه‌كانی ژیان ته‌نها بۆ كه‌مینه‌یه‌كی ده‌سه‌ڵاتدار له‌ سه‌ركرده‌ و حیزبه‌كان بێت و زۆرینه‌ش لێی بێبه‌ش بن،له‌كاتێكدا ئه‌و كه‌مینه‌ گه‌نده‌ڵ و خۆسه‌پێن و پاوانخوازانه‌ كۆنتڕۆڵی ته‌واوی جومگه‌كانی ژیان و گوزه‌رانی نیشتمانیان كردبێت،به‌ڵام له‌به‌رامبه‌ریشدا زۆرینه‌ له‌و نیشتمانه‌دا بێبه‌شكراو وبرسی و كرێنشین بن،ئیدی چی ده‌یانبه‌ستێته‌وه‌ به‌و نیشتمانه‌ و چۆن ئینتیمایه‌كیان بۆی هه‌بێت؟
كه‌واته‌ تا سیسته‌مێكی حوكمڕانی ڕه‌شید و ژیر و دیموكراسی ته‌واو نه‌چه‌سپێت كه‌ هه‌موان وه‌كویه‌ك هه‌ست به‌یه‌كسانی ئه‌رك و مافه‌كانیان نه‌كه‌ن و دادپه‌روه‌ری نه‌بینن له‌كار وكرده‌وه‌ و دابه‌شكردنی خێروبێری نیشتماندا و نیشتمان نه‌بێته‌ به‌هه‌شتێك بۆ خۆیان ونه‌وه‌كانیشیان هه‌رگیز نیشتمان نابێته‌ هی هه‌موانو ئه‌وكاتیش هه‌ركه‌سه‌ ده‌یه‌وێت چیتر له‌و نیشتمانه‌دا نه‌مێنێته‌وه‌ و خۆی لێ ڕزگار بكاتو به‌جێی بهێڵێت.

به‌داخه‌وه‌ سه‌ركرده‌ و حیزب و شۆڕشه‌كانی كورد به‌گشتی له‌هه‌ر چوار به‌شه‌كه‌یدا و به‌تایبه‌تیش له‌ باشووری كوردستاندا هه‌ر له‌ قۆناغی شاخ و شۆڕشه‌وه‌ تاكو ئێستای سه‌رده‌می حومكڕانی و ده‌سه‌ڵاتدا،نیشتمان هه‌ر بۆ كه‌مینه‌یه‌كی ده‌سه‌ڵاتدار بوه‌ و زۆرینه‌ش خۆیان به‌بێگانه‌ زانیوه‌،هه‌ربۆیه‌ش نیشتمان سه‌رناكه‌وێت و پێشناكه‌وێت و له‌بازنه‌یه‌كی بۆشدا ده‌سوڕێته‌وه‌ و زۆرینه‌ تیایدا هه‌ست به‌ ئه‌مان و ئاسایش ناكات،چونكه‌ سه‌ركرده‌ و حیزبه‌ سیاسیه‌كان هێنده‌ی بۆ به‌رژه‌وه‌ندی كه‌سی و بنه‌ماڵه‌یی له‌هه‌وڵدان نیوهێنده‌ له‌خه‌می زۆرینه‌ و نیشتماندا نین،ئه‌وه‌ندی به‌رژه‌وه‌ندیه‌ ته‌سك و بچوكه‌ حیزبی و سه‌ركرده‌یی و بنه‌ماڵه‌یی و ناوچه‌ییه‌كانیان لامه‌به‌سته‌ نیوهێنده‌ به‌رژه‌وه‌ندی باڵای گه‌ل و نیشتمانیان لا  پیرۆز نیه‌.جا تا ئه‌وكاته‌ی كه‌ هه‌موان وه‌كو یه‌ك له‌ پێناو نیشتماندا قوربانی نه‌ده‌ن هیچ كات نیشتمان نابێته‌ هی هه‌موان.

نه‌وزادی موهه‌ندیس


PUKmedia

ئەمانەش ببینە

زۆرترین خوێنراو

هەواڵەکان دەنێرین بۆ مۆبایلەکانتان

ئەپڵیکەیشنی

app دابەزێنە

Play store app store app
The News In Your Pocket