سه‌رۆكایه‌تی په‌رله‌مان پیرۆزبایی له‌ ژنانی كوردستان ده‌كات

.

سه‌رۆكایه‌تی په‌رله‌مانی كوردستان به‌بۆنه‌ی 8ی مارس، رۆژی جیهانی ژنان په‌یامی پیرۆزبایی ئاراسته‌ی ژنانی جیهان به‌ گشتی و ژنانی كوردستان به‌تایبه‌تی ده‌كات و ئاماژه‌ بۆ ئه‌وه‌شده‌كات، ژنانی كوردستان رۆڵیكی مێژووییان له‌ خه‌باتی رزگاریخوازی گه‌له‌كه‌ماندا هه‌بووه‌ و له‌ سه‌نگه‌ری پێشه‌وه‌ی خۆڕاگری و قوربانیدانی میلله‌ته‌كه‌ماندا بوون.

ده‌قی په‌یامه‌كه‌...
به‌بۆنه‌ی 8ی مارس، رۆژی جیهانیی ئافره‌تان، جوانترین پیرۆزبایی خۆمان ئاراسته‌ی ئافره‌تانی جیهان به‌ گشتی و ئافره‌تانی كوردستان به‌تایبه‌تی ده‌كه‌ین و سڵاو و رێزێكی تایبه‌ت بۆ خانه‌واده‌ سه‌ربه‌رزه‌كانی شه‌هیدانی كوردستان ده‌نێرین.
بێگومان، ئافره‌تی كوردستان رۆڵیكی مێژووییان له‌ خه‌باتی رزگاریخوازی گه‌له‌كه‌ماندا هه‌بووه‌ و له‌ سه‌نگه‌ری پێشه‌وه‌ی خۆڕاگری و قوربانیدانی میلله‌ته‌كه‌ماندا بوون، هه‌روه‌ها به‌شی زۆری ئێش و ئازاری ئه‌م گه‌له‌ له‌سه‌رشانی ئافره‌تان بووه‌، زێده‌باری ئه‌وه‌ش رۆڵێكی سه‌ره‌كیشی گێڕاوه‌ له‌به‌ره‌وپێشبردنی بواره‌كانی ژیانی سیاسی و ئابووری و كۆمه‌ڵایه‌تی و فه‌رهه‌نگی و سه‌رجه‌م بواره‌كانی تردا. ئه‌مرۆش، كه‌ هه‌رێمی كوردستان رووبه‌ڕووی دۆخێكی سیاسی و ئابووری بووه‌ته‌وه‌، پشكی شێری مه‌ینه‌تییه‌كان و بارگرانیی ئابووری به‌ر ئافره‌ت كه‌وتووه‌، بۆیه‌ پاراستنی مافه‌كانی ئافره‌ت و رێزگرتن له‌ قوربانیدان و داواكارییه‌كانیان و كه‌مكردنه‌وه‌ی ئێش و ئازاره‌كانیان و به‌دیهێنانی ئاوات و ئامانجه‌كانیان، به‌ئه‌ركی سه‌رشانی هه‌موو لایه‌كمان ده‌زانین.
دووباره‌ پیرۆزبایی له‌ ئافره‌تانی كوردستان ده‌كه‌ین و ده‌ستخۆشی له‌ هه‌ر هه‌وڵێك ده‌كه‌ین به‌ ئاراسته‌ی داكۆكیكردن له‌ شكۆ و مافه‌كانیان.

سه‌رۆكایه‌تیی په‌رله‌مانی كوردستان
2018/3/8