پیرۆزبایی خانمی یه‌كه‌می عیراق به‌بۆنه‌ی رۆژی جیهانی ژنانه‌وه‌

.

روناك عه‌بدولواحید مسته‌فا خانمی یه‌كه‌می عیراق و سه‌رۆكی رێكخراوی عه‌ره‌بی ژنان، به‌بۆنه‌ی رۆژی جیهانی ژنانه‌وه‌ پیرۆزبایی له‌ ژنانی عیراق و جیهان ده‌كات كه‌ تیایدا ستایشی سه‌ركه‌وتنی كردن كه‌ توانای سه‌ركرده‌یی خۆیان سه‌لماندووه‌ له‌ بواره‌ سیاسی، ئابوری، روناكبیری و كۆمه‌ڵایه‌تیدا، داوای كاركردنی زیاتری زیندوو و بنیاتنه‌ری كردووه‌ بۆ چاككردنی باری كۆمه‌ڵایه‌تیان و به‌ده‌ستهێنانی ته‌واوی مافه‌كانیان وه‌ك هاووڵاتیه‌ك كه‌ له‌گه‌ڵ پیاواندا یه‌كسان بن. پێویستی به‌گژاچونه‌وه‌ی هه‌ر شێوه‌ جیاكاری و توندوتیژییه‌كی دووپاتكرده‌وه‌ دژی ژنان و به‌ره‌نگاربوونه‌وه‌ی هه‌رشتێك كه‌ دژی پێگه‌ی ژنان بێت له‌ بابه‌تی نه‌ریته‌ باوه‌كانی توندڕه‌وی و دواكه‌وتویی و نه‌زانی به‌رامبه‌ر ژنان، نیگه‌رانیشی ده‌ربڕی بۆ به‌رده‌وامبوونی مه‌ینه‌تییه‌كانی ژماره‌یه‌كی زۆری ژنان له‌ عیراق و ناوچه‌كه‌ به‌ده‌ست تیرۆرو كوشتن و رفاندن و یه‌خسیركردن و راگواستن و ئاواره‌بونه‌وه‌. ئه‌مه‌ش ده‌قی پیرۆزباییه‌كه‌یه‌:

به‌ناوی یه‌زدانی مه‌زن و میهره‌بانه‌وه‌
سڵاوتان لێبێت..
به‌ بۆنه‌ی جه‌ژنی جیهانی ژنانه‌وه‌ خۆشحاڵ ده‌بم گه‌رمترین پیرۆزبایی له‌ ژنانی عێراق و ناوچه‌كه‌و له‌ڕێی ئه‌وانیشه‌وه‌ له‌هه‌موو ژنانی جیهان بكه‌م و شانازی قوڵ ده‌ببڕم به‌ رۆڵی شایسته‌یان كه‌ ده‌یگێڕن له‌ خزمه‌تكردنی كۆمه‌ڵه‌كه‌یانداو له‌ پرۆسه‌ی چاكسازی و بنیاتنانی دیموكراسی و په‌ره‌پێداندا سه‌رباری سه‌ركه‌وتنیان له‌ سه‌لماندنی تواناكانیان له‌ سه‌ركردایه‌تیكردندا له‌ بواره‌كانی سیاسی، ئابوری، كلتوریی و كۆمه‌ڵایه‌تیدا.

شادمان ده‌بم ئه‌م ده‌رفه‌ته‌ بڕه‌خسێنم بۆ نوێكردنه‌وه‌ی داواكاری له‌پێناوی كاركردنی زیاتری زیندوی بنیاتنه‌ر بۆ چاككردنی باری كۆمه‌ڵایه‌تی ژنان له‌ عیراق و ناوچه‌كه‌و به‌رده‌وامی هه‌وڵه‌كان بۆ ده‌سته‌به‌ركردنی ته‌واوی هه‌وڵه‌كانیان وه‌ك هاووڵاتیه‌كی بێ كه‌م زانینی له‌ كۆمه‌ڵ كه‌ هاوبه‌شی پیاوان بێت له‌ هه‌موو ئاست و بواره‌كاندا.

له‌م بۆنه‌یه‌دا دووباره‌ ته‌ئكید ده‌كه‌ینه‌وه‌ له‌سه‌ر داواكردن بۆ به‌گژاچونه‌وه‌ی هه‌رشێوه‌ جیاكاری و توندوتیژییه‌ك دژی ژنان و به‌ره‌نگاربونه‌وه‌ی هه‌ر شتێك كه‌ دژی پێگه‌ی ژنان بێت له‌ بابه‌تی نه‌ریته‌ باوه‌كانی توندڕه‌وی و دواكه‌وتوی و نه‌زانی به‌رامبه‌ر ژنان، له‌گه‌ڵ نیگه‌رانی ده‌ربڕین له‌ به‌رامبه‌ر به‌رده‌وامبوونی مه‌ینه‌تییه‌كانی ژماره‌یه‌كی زۆری ژنان له‌ عیراق و هه‌ندێك ده‌وڵه‌تی ناوچه‌كه‌ به‌ده‌ست ئاسه‌واره‌كانی تیرۆرو كوشتن و رفاندن و یه‌خسیركردن و راگواستن و ئاواره‌بوون.

هه‌موو ساڵێك ژنان له‌ عیراق و ناوچه‌كه‌و جیهان له‌ خۆشی و ئاشتیدا بن و پێگه‌و رۆڵی پێشه‌نگی رێبه‌رایه‌تیكردنی ژنان له‌ كۆمه‌ڵه‌كانماندا به‌هێزبێت.

به‌خوداتان ده‌سپێرم

PUKmedia تایبه‌ت