په‌رله‌مانی كۆریای باشور جینۆسایدی گه‌لی كوردستانی ناساند

پێویسته‌ هه‌موو دنیا له‌مه‌رگه‌ساته‌كانی كورد ئاگاداربن

پێش نیوه‌رۆی ئه‌مڕۆ 27-6-2013  ئارام ئه‌حمه‌د وه‌زیری كاروباری شه‌هیدان و ئه‌نفالكراوان پێشوازی كرد له‌ هیون میونغ كیم باڵیوزی كوریای باشوور له‌ عیراق و كونسڵی ئه‌و وڵاته‌ له‌ كوردستان و وه‌فدێكی هاورێیان.

له‌ دیدارێكدا باڵیوزی كوریا باشور له‌ هه‌رێمی كوردستان دوای ئه‌وه‌ی ئامانجی سه‌ردانه‌كه‌ی روون كرده‌وه‌ رایگه‌یاند: دوای ئه‌وه‌ی وه‌فدی په‌رله‌مانی كۆریا به‌شداری له‌ یادی 25 ساڵه‌ی جینوسایدی گه‌لی كوردستان كرد له‌ به‌هاری ئه‌مساڵ، به‌ هۆی كاریگه‌ری ئه‌و مه‌رگه‌ساته‌ی كه‌ به‌سه‌ر كوردا هاتوو له‌ رابردوودا، په‌رله‌مانی كۆریای باشور وێڕای ده‌ربڕینی هاوخه‌می له‌گه‌ڵ گه‌لی كوردستان له‌ رۆژی 25-6-2013 ئه‌و تاوانانه‌ی به‌سه‌ر كوردا هاتوون ناساند و داوای له‌ كۆمه‌ڵگه‌ی نێو ده‌ه‌وڵه‌تی كرد كه‌ هه‌نگاو بنێ بۆئه‌وه‌ی جارێكی تر ئه‌م تاوانانه‌ی به‌سه‌ر كوردا هاتوو دوباره‌ نه‌بێته‌وه‌ و كار بۆ قه‌ره‌بوو كردنه‌وه‌ی قوربانیان بكرێت.

له‌لایه‌ن خۆیه‌وه‌ دوای به‌خێر هێنان وه‌زیری كاروباری شه‌هیدان و ئه‌نفالكراوان سوپاس گوزاری حكومه‌تی هه‌رێمی كوردستان و كه‌س و كاری شه‌هیدانی به‌ حكومه‌ت و په‌رله‌مان و گه‌لی كوریا راگه‌یاند و هه‌نگاوی ناساندنی جینۆسایدی له‌ په‌رله‌مانی ئه‌م وڵاته‌ی به‌ هه‌نگاوێكی گرنگ وه‌سف كرد بۆ به‌دی هێنانی ئه‌و ئامانجانه‌ی كه‌ حكومه‌ت و وه‌زاره‌تی شه‌هیدان كاری بۆ ده‌كات.

هه‌روه‌ك ئه‌و كار و پرۆژانه‌ی به‌رز نرخان كه‌ تیپی زه‌یتونی سه‌ر به‌ كۆریای باشور له‌ دروشمی ئێمه‌ دۆستی ئێوه‌ین له‌ كوردستان ئه‌نجامی داوه‌ و كاریگه‌ری ئه‌رێنی له‌سه‌ر پته‌و كردنی په‌یوه‌ندیه‌كان له‌ هه‌موو لایه‌كیدا هه‌بوو.

له‌ كۆتایی دیداره‌كه‌شدا وه‌زیری كاروباری شه‌هیدان و ئه‌نفالكراوان تیشكی خسته‌ سه‌ر هه‌نگاوه‌كانی وه‌زاره‌تی بۆ به‌نێو نه‌ته‌وه‌یی ناساندنی جینوسیادی گه‌لی و هیوای خواست هه‌موو دونیا له‌م مه‌رگه‌ساتانه‌ی به‌سه‌ر كوردا هاتوه‌ ئاگادار بن.

PUKmedia هه‌ولێر _ فوئاد عوسمان