كوردێك پۆستی جێگری پارێزگاری دیاله‌ وه‌رده‌گرێت

پارێزگارو جێگره‌كه‌ی و سه‌رۆكی ئه‌نجومه‌نی پارێزگای دیاله‌ هه‌ڵبژێردران

ئه‌نجومه‌نی نوێی پارێزگای دیاله‌ كۆبوویه‌وه‌و تیایدا پارێزگارو جێگره‌كه‌ی و سه‌رۆكی ئه‌نجومه‌نی ئه‌و پارێزگایه‌ی هه‌ڵبژێدران.

سه‌رچاوه‌یه‌ك له‌ئه‌نجومه‌نی پارێزگای دیاله‌ به‌ PUKmediaی وت: ئه‌مڕۆ 19-6 ئه‌نجومه‌نی نوێی پارێزگای دیاله‌ بۆ دیاریكردنی پارێزگارو جێگره‌كه‌ی و سه‌رۆكی ئه‌نجومه‌نی ئه‌و پارێزگایه‌ كۆبوویه‌وه‌، له‌كۆبوونه‌وه‌كه‌دا عومه‌ر حومه‌یری پارێزگاری پێشوی دیاله‌ له‌كوتله‌ی عیراقیه‌ به‌پارێزگاری نوێ هه‌ڵبژێردرایه‌وه‌و كه‌ریم محه‌مه‌د زه‌نگه‌نه‌ له‌لیستی برایه‌تی و پێكه‌وه‌ ژیان بوه‌ته‌ جێگری پارێزگارو محه‌مه‌د جه‌وادیش له‌ كوتله‌ی ئه‌حراو پۆستی سه‌رۆكی نوێی ئه‌نجومه‌نی پارێزگای دیاله‌ی وه‌رگرتوه‌.
به‌وته‌ی ئه‌و سه‌رچاوه‌یه‌ له‌كۆبوونه‌وه‌كه‌دا 18 ئه‌ندام ئاماده‌بوون و دواتریش دیاریكردنی پۆسته‌كانی ئه‌و پارێزگایه‌ خراوه‌ته‌ ده‌نگدانه‌وه‌.

هه‌روه‌ها له‌دژی هه‌ڵبژاردنه‌وه‌ی عومه‌ر حومه‌یری به‌پارێزگاری دیاله‌ ده‌یان كه‌س له‌شاری به‌عقوبه‌ خۆپیشاندانیان كردو دژی ئه‌وه‌ بوون كه‌ حومه‌یری ببێته‌وه‌ به‌پارێزگار.

لای خۆشیه‌وه‌ عومه‌ر حومه‌یری پارێزگاری نوێی دیاله‌ به‌ PUKmediaی وت: هه‌ندێك له‌ سیاسیه‌كان نایانه‌وێت دیموكراتی و هاوبه‌شی له‌و پارێزگایه‌ به‌ڕێوه‌بچێت، هه‌ندێك له‌عه‌شایه‌ره‌كان رێگای خالس و میقدادیه‌و عه‌باسیه‌ی سه‌ر به‌پارێزگای دیاله‌یان داخستوه‌ به‌تایبه‌ت ئه‌و رێگایه‌ ده‌گاته‌ به‌عقوبه‌، ده‌یانه‌وێت رێگری له‌پێكهێنانی حكومه‌تی ناوخۆی پارێزگای دیاله‌ بكه‌ن.

PUKmedia محه‌مه‌د موراد - دیاله‌