لایه‌نه‌كانی ئۆپۆزسیۆن بایكۆتی كۆبونه‌وه‌كه‌ی په‌رله‌مان و حزبه‌كان ده‌كه‌ن

كۆبوونه‌وه‌ی سه‌رۆكایه‌تی په‌رله‌مان له‌گه‌ڵ حزبه‌كان به‌بێ ئۆپۆزسیۆن ده‌بێت

لایه‌نه‌كانی ئۆپۆزسیۆن رایده‌گه‌یه‌نن به‌شداری ئه‌و كۆبوونه‌وه‌یه‌ ناكه‌ن كه‌ سه‌عات چواری ئێواره‌ی ئه‌مڕۆ 19-6 له‌ته‌لاری په‌رله‌مانی كوردستان له‌نێوان سه‌رۆكایه‌تی په‌رله‌مان و نوێنه‌ری ئه‌و حزب و لایه‌نه‌ سیاسیانه‌دا ده‌بێت كه‌ نامه‌یان له‌باره‌ی ده‌ستوره‌وه‌ ئاڕاسته‌ی سه‌رۆكی هه‌رێم كردوه‌.

له‌وباره‌یه‌وه‌ كاردۆ محه‌مه‌د سه‌رۆكی فراكسیۆنی گۆڕان له‌په‌رله‌مانی كوردستان به‌ PUKmedia ی وت: ئێمه‌ وه‌ك فراكسیۆنه‌كانی په‌رله‌مان دوو كۆبوونه‌وه‌مان له‌گه‌ڵ سه‌رۆكایه‌تی په‌رله‌مان ئه‌نجامدا له‌باره‌ی ئه‌و نامه‌یه‌ی كه‌ له‌لایه‌ن سه‌رۆكی هه‌رێمه‌وه‌ ره‌وانه‌ی سه‌رۆكایه‌تی په‌رله‌مان كراو بوو تیایدا سه‌رنج و تێبینی لایه‌نه‌كانی له‌سه‌ر پرسی ده‌ستور تێدا خرابویه‌ڕوو تا میكانیزمێك بۆ مامه‌ڵكردن له‌گه‌ڵ نامه‌كه‌ بدۆزینه‌وه‌، به‌ڵام هیچ ئه‌نجامێكی نه‌بوو، ده‌بێت په‌رله‌مان وه‌ك دامه‌زراوه‌یه‌كی ره‌سمی مامه‌ڵه‌ له‌گه‌ڵ ئه‌و نامه‌یه‌ بكات.

سه‌رۆكی فراكسیۆنی گۆڕان راشیگه‌یاند: لایه‌نه‌كان ده‌ڵێن نوێنه‌ره‌كانمان له‌په‌رله‌مانه‌، بۆیه‌ پێویست به‌كۆبوونه‌وه‌یه‌كی له‌و شێوه‌یه‌ ناكات، وه‌ك ئۆپۆزسیۆنیش پێمانوایه‌ ده‌بێت په‌رله‌مان خۆی كۆبوونه‌وه‌ بكات و بڕیاری خۆی بدات، بۆیه‌ نوێنه‌رمان به‌شداری له‌كۆبوونه‌وه‌كه‌دا ناكات.

لای خۆشیه‌وه‌ عومه‌ر عه‌بدولعه‌زیز سه‌رۆكی فراكسیۆنی یه‌كگرتووی ئیسلامی له‌په‌رله‌مانی كوردستان ئه‌وه‌ی بۆ PUKmedia رونكرده‌وه‌ كه‌ له‌كاتی كۆبوونه‌وه‌كانی پێشتریاندا له‌گه‌ڵ  سه‌رۆكایه‌تی په‌رله‌مان له‌سه‌ر نامه‌كه‌ی  سه‌رۆكی هه‌رێم داوای لیژنه‌یه‌كی په‌رله‌مانیان كردوه‌، به‌ڵام پارتی دیموكراتی یكوردستان پێداگیری له‌سه‌ر كۆبوونه‌وه‌یه‌ك كردوه‌ له‌نێوان سه‌رۆكایه‌تی  په‌رله‌مان و فۆاكسیۆنه‌كان و نوێنه‌ری حزبه‌كان و ئه‌ندامانی لیژنه‌ی نوسینه‌وه‌ی ده‌ستور، به‌ڵام وه‌ك ئۆپۆزسیۆن پێمانوایه‌ ئه‌و كۆبوونه‌وه‌یه‌ پێویست نیه‌و سه‌رۆكی هه‌رێم له‌نامه‌كه‌یدا سه‌رنج و تێبینی لایه‌نه‌كانی له‌سه‌ر پرسی ده‌ستور ناردوه‌ بۆ په‌رله‌مان، هیچ خاڵێكی تازه‌ نیه‌ كه‌ جێی باسكردن و قسه‌كردنی بێت له‌سه‌ری، بۆیه‌ به‌شداری كۆبوونه‌وه‌كه‌ی سه‌عات چواری ئه‌مڕۆ ناكه‌ین.

PUKmedia تایبه‌ت