هه‌نگاریا ئه‌زموون و پسپۆڕییه‌كانی دێنێته‌ هه‌رێم

هه‌نگاریا كونسوڵخانه‌ له‌ هه‌ولێر ده‌كاته‌وه‌

حكومه‌تی هه‌نگاریا په‌یوه‌ندییه‌كانی له‌گه‌ڵ هه‌رێمی كوردستان په‌ره‌پێده‌دات و بۆئه‌و مه‌به‌سته‌ش به‌نیازه‌ كونسوڵخانه‌یه‌ك له‌هه‌ولێر بكاته‌وه‌.
ئه‌مڕۆ 19-6، له‌میانه‌ی دیدارێكی نێوان نێچیرڤان بارزانی، سه‌رۆكی حكومه‌تی هه‌رێم و تیبۆر زاتماری، باڵیۆزی هه‌نگاریا له‌ عیراق، باس له‌ چۆنیه‌تی بره‌ودان به‌ په‌یوه‌ندییه‌ دووقۆڵییه‌كان له‌ سه‌رجه‌م بواره‌كاندا كرا.
باڵیۆزی هه‌نگاریا ئاماژه‌ی به‌ هه‌وڵه‌كانی وڵاته‌كه‌ی كرد بۆ كردنه‌وه‌ی كونسوڵخانه‌ له‌ هه‌رێم، له‌پێناو به‌ره‌پێشبردنی په‌یوه‌ندییه‌كانی نێوانیان.
راشیگه‌یاند: هه‌نگاریا به‌گرنگییه‌كی زۆره‌وه‌ ده‌ڕوانێته‌ په‌یوه‌ندییه‌كانی له‌گه‌ڵ هه‌رێمی كوردستان و كاری كۆمپانیاكانی وڵاته‌كه‌ی له‌هه‌رێم، به‌تایبه‌تیش له‌بواری به‌رهه‌مێنانی نه‌وت و هاوكاریی ووزه‌دا.
هه‌روه‌ها ئاماده‌یی وڵاته‌كه‌شی ده‌ربڕی بۆ هاوكاریكردنی پێشخستنی داموده‌زگاو دامه‌زراوه‌كانی هه‌رێمی كوردستان، له‌ڕێی پێشكه‌شكردنی شاره‌زایی و ئه‌زموون و پسپۆڕی.
له‌ به‌رامبه‌ردا سه‌رۆكی حكومه‌تی هه‌رێم هیوای خواست په‌یوه‌ندییه‌ دووقۆڵییه‌كان سه‌رجه‌م سێكته‌ره‌كان بگرێته‌وه‌و ئاماده‌یی پێشكه‌شكردنی هه‌موو جۆره‌ كارئاسانییه‌كیشی بۆ ئه‌و مه‌به‌سته‌ ده‌ربڕی.

PUKmedia تایبه‌ت