هۆكاره‌كانی وازهێنانی كچان له‌خوێندن ده‌خرێنه‌ڕوو

ساڵ به‌ساڵ رێژه‌ی وازهێنانی كچان له‌خوێندن كه‌م ده‌بێته‌وه‌

ئه‌مڕۆ 18-6 له‌هۆڵی ئوتێل چوارچرا له‌شارى هه‌ولێر رێكخراوی تواناسازی ژنان به‌ئاماده‌بونی ئه‌ندامانی په‌رله‌مان و نوێنه‌ری وه‌زاره‌تی رۆشنبیری و وه‌زاره‌تی كار و كاروباری كۆمه‌ڵایه‌تی و وه‌زاره‌تی په‌روه‌رده‌ و وه‌زاره‌تی ئه‌وقاف و یه‌كێتی زانایانی ئاینی، كۆنفرانسێكی سه‌باره‌ت به‌ قسه‌كردن له‌سه‌ر هۆكاری دابرانی كچان له‌ خوێندن ئه‌نجامدا.

ئاڤان عه‌بدولره‌زاق له‌رێكخراوی تواناسازی ژنان و سه‌رپه‌رشتیاری پرۆژه‌ی باشتر كردنی هه‌لی خوێندن بۆ گه‌نجان و منداڵان به‌PUKmedia ی  راگه‌یاند: ئه‌و كۆنفرانسه‌ی ئه‌مرۆ سه‌باره‌ت به‌و هۆیانه‌ بوو كه‌ وا ده‌كات كچان له‌ خوێندن دووربكه‌ونه‌وه‌ به‌تایبه‌ت له‌ناوچه‌ دابڕاوه‌كان و شار و شارۆچكه‌كانی ده‌ره‌وه‌ی هه‌ولێر و سلێمانی و دهۆك.

وتیشی: له‌گه‌ڵ رێكخراوی ARC پێكه‌وه‌ سه‌ردانی ئه‌و 3 پارێزگایه‌مان كرد و خولی راهێنانمان تێدا ئه‌نجامدا و دایك و باوكان و توێژه‌ری كۆمه‌ڵایه‌تی  و مامۆستایانی خوێندنگه‌كان و كچان و منداڵان به‌شداریان له‌  راهێنانه‌كه‌داكرد، بۆئه‌وه‌ی بزانین ئه‌و هۆكارانه‌ چین كه‌وا له‌كچان ده‌كات له‌خوێندن داببڕێن و هه‌روه‌ها چه‌ند خولێكی راهێنان و هۆشیاریمان بۆ مامۆستایانی ئاینی كرده‌وه‌ كه‌ رۆڵێكی زۆر گرنگیان هه‌یه‌ له‌ناو كۆمه‌ڵگه‌ و هۆشیاری كۆمه‌ڵگه‌ له‌روی گرنگی پێدانی ناردنی كچان بۆ خوێندنگه‌.

راشیگه‌یاند: ئامانجمان  له‌و كۆنفرانسه‌ی ئه‌مرۆ ئه‌وه‌یه‌ كه‌ بزانین هه‌ر وه‌زاره‌تێك یان رێكخراو و ده‌زگایه‌ك تاچه‌ند رۆڵیان هه‌یه‌ له‌ گرنگی دان به‌و حاڵه‌ته‌، ئێستا ئێمه‌ له‌ساڵی 2013 داین به‌ڵام به‌رده‌وام كچان له‌ خوێندن داده‌بڕێن، كچیش وه‌كو كوڕ مافی خۆیه‌تی شان به‌شانی ئه‌وان بخوێنن و به‌رده‌وام بن له‌ خوێندن.
ئاشكراشیكرد: به‌پێی ئه‌و زانیاری و ئامارانه‌ی كردومانه‌ له‌شار و شارۆچكه‌كان وه‌كو سێمێل و شێخان و ناحیه‌ی شۆڕش له‌ چه‌مچه‌ماڵ، له‌گه‌ڵ به‌رده‌ ره‌ش و مه‌خمور زیاتر له‌ %40 ی كچانمان پاش شه‌شی سه‌ره‌تایی له‌خوێندن داده‌بڕێن هۆیه‌كه‌شی كۆمه‌ڵگه‌ و كلتوره‌ كه‌ ئه‌بێته‌ عه‌یبه‌ كچ دوای شه‌شی سه‌ره‌تایی بچێته‌ خوێندن و خوێندنه‌كه‌ی ته‌واو بكات، هۆكارێكی دیكه‌ ناهۆشیاری دایك و باوكانه‌ و له‌ناو هه‌ولێریش رێژه‌ی نه‌خوێنده‌واری به‌ره‌و زیاد بون ده‌چێت.

ئه‌حمه‌د گه‌ل نوێنه‌ری وه‌زاره‌تی په‌روه‌رده‌ و به‌رێوه‌به‌ری گشتی فێركردنی ئاماده‌یی و پیشه‌یی له‌ وه‌زاره‌تی په‌روه‌رده‌ به‌ PUKmedia ی راگه‌یاند: كۆبونه‌وه‌كه‌ له‌سه‌ر هۆكاری دابڕانی خوێنكار به‌گشتی به‌تایبه‌ت كچ له‌سه‌رجه‌م خوێندنگه‌كانی كوردستان به‌ڕێوه‌چوو، به‌ڵام من ده‌ڵێم ساڵ له‌دوای ساڵ دابران كه‌متر ده‌بێته‌وه‌ و له‌كۆتایی كۆبونه‌وه‌كه‌شدا له‌وانه‌یه‌ ره‌شنوسێك له‌و كۆبونه‌وه‌یه‌ بدرێته‌ وه‌زاره‌تی په‌روه‌رده‌ بۆئه‌وه‌ی ئێمه‌ش به‌رچاورونی زیاترمان هه‌بێت، هه‌رچه‌نده‌ ئێمه‌ وه‌كو وه‌زاره‌ت ئاگادارین و كارمان بۆ كه‌مكردنه‌وه‌ی دابڕان كردوه‌ خوێندنی ئێواران و خوێندنی خێرا و تاقیكردنه‌وه‌ی ده‌ركیمان هه‌یه‌ بۆئه‌وه‌ی خوێندكاری دابڕاو بگێرینه‌وه‌ بۆ خوێندن.

PUKmedia هه‌ولێر – به‌هادین سابیر