ئه‌نجومه‌نی نوێنه‌ران دانیشتنه‌كانی ده‌ستپێده‌كاته‌وه‌

سه‌رجه‌م كوتله‌كانی په‌رله‌مان به‌شداری دانیشتنه‌كان ده‌كه‌ن

پشووی ئه‌نجومه‌نی نوێنه‌رانی عیراق كۆتایی هات و بڕیاره‌ سبه‌ینێ 18-6،  ده‌ست به‌ دانیشتنه‌ ئاساییه‌كانی بكاته‌وه‌ بۆ تاوتوێكردنی چه‌ند پرۆژه‌یاسایه‌ك، پێشبینیش ده‌كرێت سه‌رجه‌م كوتله‌ په‌رله‌مانییه‌كان ئاماده‌ی دانیشتنه‌كه‌بن.
حه‌سه‌ن جیهاد، په‌رله‌مانتاری سه‌ر به‌ فراكسیۆنی هاوپه‌یمانی كوردستان له‌ ئه‌نجومه‌نی نوێنه‌رانی عیراق به‌ PUKmedia ی راگه‌یاند: له‌ دانیشتنی سبه‌ینێ دا، ده‌نگ له‌سه‌ر پرۆژه‌یاسای رێككه‌وتنی نێوان حكومه‌تی عیراق و رێكخراوی په‌یمانی ناتۆ ده‌درێت، كه‌ تایبه‌ته‌ به‌ مه‌شقپێكردنی هێزه‌ ئه‌منییه‌كانی عیراق، هه‌روه‌ها ده‌نگ له‌سه‌ر هه‌مواری چه‌ند پرۆژه‌یاسایه‌كی دیكه‌ش ده‌درێت، له‌وانه‌: هه‌مواری یه‌كه‌می سه‌نته‌ری راهێنانی نه‌قدی و بانكی و هه‌مواری پێنجه‌می یاسای ئه‌نجومه‌نی شورای ده‌وڵه‌ت و فرۆشتن و به‌كرێدانی موڵكی ده‌وڵه‌ت.
ئه‌و په‌رله‌مانتاره‌ پێشبینیشی كرد له‌ دانیشتنی سبه‌ینێی ئه‌نجومه‌نی نوێنه‌راندا، سه‌رجه‌م كوتله‌كانی په‌رله‌مان ئاماده‌ی دانیشتنه‌كه‌ بن.

PUKmedia تایبه‌ت