Pira Aştiyê di navbera Îzmir û Amedê de

şaredarê bajarê Amedê Baydemîr û yê Ezmîrê Kocaoglu

Bi pêşengiya Şaredariya Bajarê Mezin a Îzmirê şandeyeke 190 kesî hate Amedê û peyamên aştî, biratî û dostaniyê dan. Şaredariya Bajarê Mezin a Amedê molavanî kir û nûnerên hemû saziyên sivîl hatin ba hev.

Şaredarê Bajarê Mezin ê Îzmirê Aziz Kocaoglu û şaredarên navçeyan ên pê re li gel rektorên ji zanîngehên cuda cuda, rêxistinên karguzariyê, nûnerên saziyên civaka sivîl, pêkhateyên Konseya Bajêr û rojnamevanan ku 190 kesî li xwe digire, bi mebesta avakirina pira biratî û aştiyê hatin Amedê. Şande, li balefirgeha Amedê ji aliyê Şaredarê Bajarê Mezin ê Amedê Osman Baydemîr, şaredarên navçeyan, endamên meclisa bajêr ve bi kulîlkan hate pêşwazîkirin. Şandeya Îzmirê bi otobûsan li semtên Peyas û Dîclekentê geriyan û li Restorana Turistik Cafe ya li Meydana Mizgefta Mezin taştê xwarin. Li vir xwarina herêma Amedê ji wan re hate pêşkêşkirin û piştre çûn serdana Parêzgarê Amedê Mustafa Toprak. Piştî wê şandeya Îzmirê hate serdana şaredariya mezin.
Şaredarên navçeyan ên Amedê, Odeya Nazirganî û Pîşesazî jî tê de hemû nûnerên cîhana karguzariyê, nûnerên saziyên civaka sivîl, pêkhateyên Konseya Bajêr, sendîka, rojnamevan, nivîksra, nûnerên DÎAY-DERÊ, rêberên civatên olî yên Elewî, Suryanî, Keldanî, Ermenî, akademisyen û Dayikên Aştiyê bi tevahî komeke 150 kesî li Şaredariya Bajarê Mezin a Amedê pêşwaziya şandeya Îzmirê kir. Cîgirê Serokê Giştî yê CHPê Sezgîn Tanrikulu jî di pêşwazîkirinê de amade bû. 
Piştî ku Baydemîr şandeyên Amed û Îzmirê bi hev dane nasîn, bi hev re derbasî Salona Şanoyê ya Bajêr bûn. Şaredarên Bajarên Mezin ên her bajaran Osman Baydemîr û Azîz Kocaoglu li gel lijneyên herdu aliyan daxuyaniyeke hevbeş a çapemeniyê li dar xist. 
Baydemîr, da zanîn ku ew gelekî pê xweş e ku Kocaoglu û şandeya Îzmirê li vir pêşwazî dike û bi mêvanî dihewîne. Baydemîr bi bîr xist ku li Amedê 8 hezar sal in jiyan bênavber berdewam e û weha axivî, “Vî bajarî malovaniya 33 şaristaniyan kir. Di nav kevirên avesaziya Amedê ya sivîl de, di perestgehên dînî û navendên ayînî de xwêdana van 33 şaristaniyan heye. Mizgefta Mezin a Amedê weke 5emîn Harema Pîroz a cîhana îslamî tê qebûlkirin. Lê taybetiyeke vir ew e ku piştî ava bûyî weke Perêzgeha Rojê hatiye bikaranîn. Demekê misliman, xrîstiyan û cihûyan li hewşa ku digihêje heman dergehê dua kirine.” Baydemîr bal kişand ku Amed warekî pirdînî, pirzimanî, pirnasnameyî ya qedîm e û wiha got, “Ez gelekî dilxweş im ku xizmeta Amediyan dikim.”

PUKmedia